MANILA, Philippines – Nasagip ng mga pulis ang dalawang sanggol at inaresto ang kanilang mga ina sa magkahiwalay na entrapment operations matapos umanong subukang ibenta ang kanilang mga anak online.
Noong Enero 20, nasagip ng PNP Women and Children Protection Center (WCPC) ang isang isang taong gulang na batang lalaki sa Quezon City at inaresto ang 26-anyos niyang buntis na ina, na umano’y inaalok ang bata sa halagang P25,000. Ayon kay WCPC chief Police Brig. Gen. Sheila Portento, may pitong anak ang suspek at tatlong buwan na siyang buntis muli, at hindi siya sinusuportahan ng kanyang asawa.
Sumunod na araw, Enero 21, isang entrapment operation sa Batangas City ang nagresulta sa pagsagip sa isang tatlong buwang sanggol na inialok ng kanyang 26-anyos na ina para sa ilegal na adoption sa halagang P75,000.
Kagagaling lang ng suspek mula Vietnam at sinabi niyang ibinebenta ang bata para makabalik sa Vietnam at makapagtrabaho muli.
Agad na ipinasa sa mga social worker ang mga sanggol habang ang mga ina ay nakakulong sa Camp Crame. Tumanggi silang magbigay ng pahayag sa media.
Maaaring makulong ng habang-buhay ang mga ina sa paglabag sa Expanded Anti-Trafficking in Persons Act of 2012 at sa Child Trafficking sa ilalim ng Republic Act No. 7610.
Nagpahayag ng alarma ang WCPC sa pagdami ng kaso ng “babies for sale,” kung saan limang sanggol ang nasagip noong 2024, walong sanggol noong 2025, at tatlo na ngayong Enero.
Target na ngayon ng awtoridad ang hindi bababa sa 10 social media pages na pinaniniwalaang nagiging daluyan ng ilegal na adoption scheme, dagdag pa sa walong site na na-takedown na. RNT
