MANILA, Philippines- Nakatakdang ipatapon ng Bureau of Immigration (BI) pabalik ng kanilang bansa ang dalawang puganteng dayuhang inaresto sa isinagawang magkahiwalay na operasyon sa Maynila at sa Pampanga.
Kinilala ni Immigration Commissioner Norman Tansingco ang dalawa na sina South Korean Lee Yeonghak, 44, at American Stan Ray Hudgins, 63, na naaresto sa magkahiwalay na operasyon na isinagawa sa Maynila at Pampanga ng mga operatiba mula sa fugitive search unit (FSU) ng BI.
Si Lee, na naaresto noong Miyerkules sa kahabaan ng Maria Orosa Street, Ermita, at Hudgins na nahuli noong Martes sa Mabalacat, ay parehong inaresto sa bisa ng mission order na inilabas ni Tansingco sa kahilingan ng mga awtoridad ng South Korea at US.
Nabatid na nakakulong na ang mga nabanggit na dayuhan sa BI warden facility sa Camp Bagong Diwa, Taguig City habang nakabinbin ang kanilang deportation proceedings.
Sinabi ni Tansingco na ipade-deport ang dalawa dahil sa pagiging undesirable alien at dahil sa pagiging undocumented matapos kanselahin ang kanilang mga pasaporte ng kani-kanilang gobyerno.
Nabatid sa BI na si Lee ay pinaghahanap ng mga awtoridad sa Seoul para sa pagkakasangkot sa mga ilegal na operasyon ng online gaming. Isang warrant of arrest ang inisyu sa kanya ng tanggapan ng tagausig ng distrito ng Daegu na inakusahan siya ng pag-set up ng mga site ng pagsusugal sa Internet sa paglabag sa mga batas ng kanyang bansa laban sa ilegal na pagsusugal.
Nakipagsabwatan din umano siya sa pinuno ng isang sindikato sa pagtatatag ng nasabing mga online gaming sites mula noong 2022 kung saan nakakuha sila ng kita na nagkakahalaga ng 90 bilyong won, o humigit-kumulang US$67 milyon.
Nabatid naman na si Hudgins ay may warrant of arrest na inisyu ng korte ng pamilya sa Richard County, South Carolina matapos siyang kasuhan dahil sa hindi pagbabayad ng suporta sa bata.
Inilarawan ng mga ulat ng intelligence si Hudgins bilang armado at delikado dahil palagi umano itong may dalang nakamamatay na sandata. JAY Reyes
