MANILA, Philippines – Sa halip na simulan ang paglilitis sa plunder case ni Sen. Rodante Marcoleta kaugnay ng umano’y P75 milyong hindi idineklarang donasyon, tinalakay ng Sandiganbayan Third Division nitong Oktubre 8 ang mosyon na alisin ang dalawang testigo ng prosekusyon.
Nagkasundo ang magkabilang panig na hindi na iharap bilang mga testigo ang abogadong sina Cecil Federizo at Lucia Paula Corrales. Nagkasundo rin sila sa pagiging tunay at wastong pagkakagawa ng mga kasulatan ng donasyon.
Ayon sa prosecutor na si Joshua Tan, si Federizo ang nagnotaryo sa mga kasulatan, habang si Corrales ang clerk of court na tumanggap ng notarial book na naglalaman ng mga rekord. Hindi pa nakapanayam ng prosekusyon si Federizo dahil iginiit nito ang attorney-client privilege.
Kinuwestiyon ng abogado ni Marcoleta na si David Gabriel ang pagtestigo kay Federizo, at kalaunan ay sinabi niyang hindi na rin ito ihaharap ng depensa. Kinumpirma rin ng prosekusyon na gagamitin nito ang mga testimonya mula sa bail hearings ni Marcoleta at ng tatlo niyang kapwa akusado.
Isinumite na para sa resolusyon ang mosyon para sa piyansa matapos magsumite ng kani-kanilang memorandum ang magkabilang panig. Itinakda ang susunod na pagdinig sa Oktubre 19.
Bukod kay Marcoleta, nahaharap din sa plunder at paglabag sa Presidential Decree No. 46 sina dating mambabatas Michael “Mike” Defensor at mga negosyanteng sina Joseph Espiritu at Aristotle Viray.
Nagsampa ng kaso ang Office of the Ombudsman noong Hulyo 3 dahil sa umano’y tatlong cash donation na nagkakahalaga ng kabuuang P75 milyon na hindi idineklara ni Marcoleta sa kanyang Statements of Assets, Liabilities and Net Worth (SALNs) at campaign finance reports.
Ayon sa Ombudsman, kabilang sa ebidensya ang pahayag ni Marcoleta sa isang programa sa telebisyon kung saan kinilala niya ang pagtanggap ng pera. RNT/MDS
