ILOCOS SUR- Himas-rehas ang dalawang lalaki matapos silang maaktuhang nagnanakaw ng panabong na manok sa isang Farm sa Brgy. Nansuagao, Caoayan ng lalawigang ito kaninang madaling-araw, Nobyembre 25.
Ayon sa Caoayan Municipal Police Station, ang mga naaresto ay isang 32-anyos na lalaki, may asawa, at isang 16-anyos na estudyante, parehong tubong-Bacnotan, La Union at parehong naninirahan ngayon sa Brgy. Taleb, Bantay, Ilocos Sur.
Ang naturang farm ay pag-aari naman ng isang 63-anyos na lalaki, may asawa, residente ng naturang lugar.
Bandang 12:50 ng madaling-araw ay nakarinig ang mga kapitbabay ng biktima ng mga ingay ng mga manok mula sa naturang farm.
Nakita nila ang dalawang suspek na may mga isinasakong mga panabong na manok kaya agad nilang ipinagbigay-alam ito sa mga barangay officials sa kanilang lugar na agad naman tumawag sa Caoayan CPS para humingi ng tulong.
Pagdating ng mga otoridad sa naturang lugar ay nahuli nila sa akto ang dalawang suspek na abala sa pagnanakaw ng manok ngunit nakatakbo ang mas matandang suspek samantalang naiwan ang menor de edad na kasama nito.
Gayunman, agad din itong naaresto sa isinagawang hot pursuit operation ng mga otoridad. Rolando S. Gamoso
