MANILA, Philippines – Matagumpay na nailigtas ng Quezon City Police District (QCPD), sa pamumuno ni PCOL Randy Glenn Silvio, ang isang 3-anyos na bata at naaresto ang isang kasambahay sa umano’y kidnap-for-ransom incident sa isinagawang follow-up operation ng mga operatiba ng pulisya.
Sa ulat ng QC police station 2 sa ilalim ng PLTCOL Rolando Baula, dakong alas-8:05 ng gabi noong Agosto 10, 2025, sa tirahan ng biktima sa Brgy. Paltok, Quezon City, ang suspek na halos dalawang taon nang nagtrabaho sa pamilya ay humingi ng permiso sa ina ng bata na pumunta sa kalapit na bahay para kumuha ng gamot dahil sa pananakit ng tiyan. Dinala niya ang 3 taong gulang na bata ngunit hindi na bumalik.
Makalipas ang ilang oras, nakatanggap ang mga magulang ng bata ng text message mula sa suspek na humihingi ng Php150,000.00 para sa ligtas na paglaya ng bata at nagbanta na sasaktan ang bata kapag hindi naihatid ang pera. Ito ang nagtulak sa pamilya na iulat ang insidente sa QC Police station 2 Masambong.
Sa mabilis na pagkilos, nagsagawa ng follow-up operation ang mga operatiba, na humantong sa pagkakaaresto sa suspek dakong alas-12:05 ng madaling araw noong Agosto 11,2025 sa kahabaan ng FPJ Avenue, Quezon City, at ligtas na nailigtas ang bata.
Ang suspek na isang kasambahay na kinilalang si alyas “Joan,” 24 anyos, at tubong Northern Samar.
Narekober sa suspek ang isang brown na shoulder bag, isang bundle ng genuine at boodle money na ginamit sa operasyon.
Nahaharap naman ang suspek sa kasong paglabag sa Article 267 ng Revised Penal Code (Kidnap-for-Ransom) sa Quezon City Prosecutor’s Office.
“Ang matagumpay na pag-aresto sa suspek at ligtas na pagsagip sa bata ay patunay ng mabilis at pagtugon ng QCPD sa mga krimen. Asahan ninyo ang tapat, maagap at makatawag ng serbisyo para sa seguridad ng bawat mamamayan.” sabi ni PCOL Silvio. (Santi Celario)
