Bulacan – Tatlong aktibong pulis ang nahuli habang tinutugis pa ang apat na kasamahang nanloob at kumuha umano ng mga bag, gadyet at P30,000,000 sa dalawang bahay ng negosyante sa Brgy. Borol 2nd,Balagtas nitong umaga ng Miyerkules, Agosto 28.
Sa report, kinilala ang mga naarestong suspek ay sina PMAJ. Armando Reyes, 55 nakatalaga sa Hagonoy police station, PSMS Ronnie Galion, 43, ng Sta. Maria police station at PSSg Anthony Ancheta, 48 ng Malolos police station.
Ayon sa report, nagkunwaring hihingi ng tulong-pinansyal sa biktimang negosyanteng supplier ng mga gamot ang mga armadong suspek at nang makapasok sa loob ay kinuha ang mga mamahaling mga gamit gaya ng mga mamahaling bag, gadyet at P30,000,000.
Nalamang nakuhanan ng CCTV ang paglabas ng mga suspek sa mga bahay ng biktima bitbit ang kinulimbat gamit ang kahon, bag at mabilis na tumakas.
Nakita rin sa CCTV ang plaka ng dalawang sasakyan hanggang sa nahuli kalaunan sa follow-up operation ng mga awtoridad ang tatlong suspek na pulis.
Sinasabing agad na tumulong ang driver ng garbage truck sa mga biktima na tiyempong naghahakot ng basura sa lugar para makaagaw-pansin sa mga kapitbahay.
Nahaharap sa kaukulang kaso ang mga naarestong suspek habang nasa kustodiya ng Bulacan police at patuloy ang follow-up operation ng pulisya para mahuli ang apat pang suspek na pinaniniwalaang kabaro rin nila. Dick Mirasol III
