MANILA, Philippines – Nakahuli ang Land Transportation Office (LTO) ng 353 colorum vehicles mula Pebrero 9 hanggang 11, ayon kay LTO chief Markus Lacanilao.
Ipinakita ang ilan sa mga nakumpiskang sasakyan sa LTO Activity Center sa Quezon City.
Pinakamarami ang nahuli sa Region IV-A (Calabarzon) na may 140, sinundan ng Region II (Cagayan Valley) na may 46, at Region X (Northern Mindanao) na may 34. Sa Metro Manila, 29 colorum vehicles din ang nasabat.
Sa kabuuan, 107 sasakyan ang pisikal na impounded habang 246 ang inilagay sa technical impoundment.
Ayon kay Lacanilao, kailangang magbayad ng P200,000 ang mga may-ari ng van at P1 milyon naman para sa bus upang makuha ang kanilang sasakyan.
May anim na buwan ang mga rehistradong may-ari para bayaran ang multa; kung hindi, isusubasta ang mga ito.
Ipinaliwanag niya na mabigat ang parusa dahil sa panganib sa kaligtasan ng mga pasahero.
“If these vehicles were involved in an accident, the vans’ owners cannot be held responsible… Passengers are the ones suffering,” aniya.
Patuloy ang operasyon ng LTO laban sa mga colorum vehicles. RNT/MND
