MANILA, Philippines – Apat na grupo ang nakakuha ng permit mula sa pamahalaang lungsod ng Quezon City upang magsagawa ng mga kilos-protesta sa Commonwealth Avenue.
Kasabay nito, nanawagan ang Philippine National Police sa mga kalahok na panatilihing mapayapa ang kanilang mga aktibidad.
Nagpakalat din ang PNP ng 20,000 tauhan sa Quezon City bago ang ikalimang State of the Nation Address ni Pangulong Ferdinand Marcos Jr. sa Hulyo 27, partikular sa Commonwealth Avenue kung saan inaasahang magtitipon ang mga grupong magsasagawa ng protesta.
Naka-full alert ang mga puwersa ng pulisya mula pa alas-5 ng hapon noong Biyernes, habang nagtayo rin ng mga tent na magsisilbing command post sa panahon ng SONA.
Ikinasa rin ang Quezon City ng liquor ban mula alas-12:01 ng madaling araw hanggang alas-6 ng gabi sa Hulyo 27 bilang bahagi ng mga hakbang sa seguridad.
Naglagay din ng mga pulis sa paligid ng Malacañang, habang isinara ang ilang kalsada sa Liwasang Bonifacio at Ayala Bridge at nagpatupad ng mga traffic rerouting scheme.
Nagpatupad naman ang Metropolitan Manila Development Authority ng rerouting sa Commonwealth Avenue, kabilang ang pagsasara ng piling U-turn slot, parking area sa harap ng UP TechnoHub, at bahagi ng Tandang Sora.
Naglagay din ng mga concrete barrier sa Commonwealth Avenue upang makagawa ng zipper lane sa southbound side.
Mananatili ring ipatutupad ang number coding scheme sa Hulyo 27, ayon sa MMDA. Santi Celario
