MANILA, Philippines – Sinabi ng Philippine Navy na apat sa 18 indibidwal na nagpakilalang dating miyembro ng Philippine Marine Corps at aides umano ni dating Congressman Elizaldy Co ay hindi kailanman naging bahagi ng militar, habang marami sa iba ay dishonorably discharged mula sa serbisyo.
Nauna nang nagbabala ang Armed Forces of the Philippines (AFP) laban sa disinformation matapos ang alegasyon ng isang pribadong abogado na nagsilbing bagmen umano ang grupo na naghatid ng ₱805 bilyon kina Pangulong Ferdinand Marcos Jr. at dating House Speaker Martin Romualdez.
Ayon kay AFP Public Affairs Chief Col. Xerxes Trinidad, kinakailangang sumailalim sa legal at imbestigatibong proseso ang mga alegasyon bago mapatunayan.
“At present, these statements consist of allegations aired in a public forum and must be evaluated through proper legal and investigative processes before competent authorities,” ani Trinidad sa isang ulat.
“We caution against grandstanding and the manipulative use of legitimate media to spread unverified claims that may contribute to disinformation. The Filipino people deserve facts, and we urge all parties to allow lawful processes to take their course,” dagdag niya.
Naglabas ng pahayag ang AFP matapos beripikahin ang claim na ang mga indibidwal ay dating Marines at umano’y kasama ng retiradong personnel na si Orly Guteza na naghatid ng mga maleta ng pera.
Inangkin din ng grupo na nagbigay umano ng $2 milyon sa International Criminal Court (ICC) investigators at ibinigay kay dating Senador Antonio “Sonny” Trillanes IV, na mariing itinanggi ang alegasyon.
Nauna nang nagbabala ang AFP na may mga indibidwal na posibleng nagpapakalat ng maling impormasyon upang pahinain ang militar bago ang ika-40 anibersaryo ng EDSA People Power Revolution. Dave Baluyot
