CEBU, Philippines – Isang grupo ng 61 Korean tourists ang nasagip matapos magkaroon ng problema sa makina ang kanilang motorized banca sa dagat ng Olango Island, Cebu noong Linggo ng hapon, Enero 4.
Ayon sa Coast Guard District Central Visayas, ang MBCA Black Pearl ang sakay ng mga turista nang pumalya ang makina nito. Dumulas ang bangka patungong San Vicente, Olango, at nagkaroon ng butas sa hulihan ng hull matapos itong tumama sa mababaw na bahagi ng dagat.
Natanggap ng Coast Guard Sub-Station (CGSS)-Olango ang ulat ng insidente bandang 12:30 p.m., at nakarating sa lugar ang mga tauhan ng Coast Guard bandang 12:40 p.m.
Ginamit ang limang speedboat at isang motorized banca upang ilipat ang mga Korean tourists sa Barangay Maribago, Lapu-Lapu City, Cebu. Walang naiulat na nasugatan sa insidente. RNT/MND
