DUMAGUETE CITY — Siyam na tauhan ng Philippine Coast Guard (PCG) Southern Visayas ang nagpositibo sa isinagawang random drug testing bilang bahagi ng kampanya ng ahensya para mapanatili ang isang drug-free at disiplinadong hanay ng mga kawani.
Isinagawa ang drug testing sa Barangay Calindagan sa pakikipag-ugnayan sa Philippine Drug Enforcement Agency (PDEA).
Ayon kay PCG Spokesperson Commodore Noemie Cayabyab, kabilang sa mga nagpositibo ang walong lalaki at isang babae. Pansamantala silang isinailalim sa restriction habang hinihintay ang resulta ng confirmatory laboratory tests.
“Based on the directive of PCG Commandant, Admiral Ronnie Gil L. Gavan, we continue to implement regular and unannounced drug testing as part of our commitment to ensuring that all personnel remain physically and mentally fit to perform their duties,” ani Cayabyab.
Dagdag niya, mahaharap sa kaukulang disciplinary action ang mga mapatutunayang positibo sa ilegal na droga matapos ang confirmatory tests.
“In accordance with existing rules, those who will be confirmed to be positive will face appropriate disciplinary actions, which include dismissal from the Coast Guard service,” dagdag ng opisyal.
Ayon sa PCG, bahagi ng kanilang Intensified Community Assistance, Awareness, Response, and Enforcement (iCARE) program ang regular na pagpapatupad ng drug testing upang mapanatili ang mataas na antas ng propesyonalismo at pananagutan sa loob ng organisasyon. Jocelyn Tabangcura-Domenden
