MANILA, Philippines – Nakakuha ng mataas na trust at performance scores si Pangulong Ferdinand Marcos Jr. bago pa ang kanyang ikatlong State of the Nation Address (SONA), batay sa isang independent, non-commissioned survey ng RP-Mission and Development Foundation Inc. (RPMD).
Ang Boses ng Bayan survey ay isinagawa ng RPMD mula Hulyo 1 hanggang 10 na nagpapakitang nakakuha si Marcos ng trust rating na 77 percent at job performance rating na 75 percent.
Aabot sa 10,000 adult Filipinos ang nakapanayam ng RPMD na nagrerepresenta sa 67.75 milyong registered voters sa buong bansa.
Pinaka-pinaboran si Marcos ng mga respondents sa Balance Luzon, matapos itong makakuha ng pinakamataas na trust at performance scores na 80.7 percent at 78.07 percent.
Pinakamababa naman ang trust rating ng Pangulo sa Mindanao (70.16 percent), habang mababa ang job performance niya sa Metro Manila sa 67.38 percent.
Ang pinakabagong trust at performance ratings ni Marcos ay bahagyang mababa kumpara sa 79 percent trust score at 76 percent approval score na naitala ng RPMD sa March 18 to 23 survey nito. RNT/JGC
