MANILA, Philippines- Hinatulang guilty ng Manila court nitong Martes ang 10 fraternity members sa kaso ng pinaslang na University of Santo Tomas (UST) law freshman na si Horacio “Atio” Castillo III, pitong taon matapos ang kanyang pagkamatay noong 2017.
Hinatulan ng Manila Regional Trial Court Branch 11 sina Arvin Rivera Balag, Mhin Wei Chan, Axel Munro Hipe, Oliver John Audrey Onofre, Joshua Joriel Macabali, Ralph Trangia, John Robin Ramos, Jose Miguel Salamat, Danielle Hans Matthew Rodrigo, Marcelino Bagtang Jr. na guilty beyond reasonable doubt sa paglabag sa Anti-Hazing Law of 1995.
Sinentensyahan sila ng reclusion perpetua o hanggang 40 taong pagkakabilanggo.
Inatasan din sila ng korte “to jointly and severally pay the heirs of Castillo P461,800 in actual expenses, P75,000 as civil indemnity, P75,000 as moral damages, and P75,000 as exemplary damages.”
“All the amounts shall earn interest at the rate of 6% per annum upon finality of the decision until fully paid,” anang korte.
Nakaditene sila sa Manila City Jail mula Mayo 2018.
Idineklara si Castillo na dead on arrival sa Chinese General Hospital sa edad na 22 taong gulang noong Setyembre 17, 2017 matapos ang initiation ng Aegis Juris fraternity, na nakabase sa Faculty of Civil Law.
Noong 2019, hinatulan ng Manila Metropolitan Trial Court Branch 14 si Solano na guilty sa obstruction at sinentensyahan ito ng dalawa hanggang apat na taong pagkakakulong.
Si Solano ang nagdala sa walang malay na si Castillo mula sa frat library sa Chinese General Hospital, kung saan siya idineklarang dead on arrival.
Una niyang sinabi sa mga pulis na nakita niyang nakahandusay sa daan si Castillo at may takip na kumot. RNT/SA
