MANILA, Philippines – Ayon sa Office of the Civil Defense (OCD) hindi bababa sa 3,773 pamilya ang naapektuhan ng bagyong Bising (internasyonal na pangalan: Danas), ngayong Linggo.
Sinabi ni OCD officer-in-charge Bernardo Rafaelito Alejandro IV na ang mga apektadong pamilya ay katumbas ng 13,006 indibidwal mula sa Ilocos Region (Region I), Cordillera Administrative Region (CAR), at Cagayan Valley (Region II).
Gayunpaman, sinabi ni Alejandro na ang bilang ay maaari pang tumaas dahil ang pinakahuling datos ay isang paunang ulat mula sa mga field office ng OCD.
Dagdag pa niya, wala pang naiulat na nasawi sa ngayon.
“Minor in a way itong Bising, but ito naman tinitingnan ‘yung ating paghahanda dahil pumasok na itong typhoon season at tuloy-tuloy na itong pag-prepare at paghanda,” ayon kay Alejandro.
Idinagdag niya na may ilang pagbaha sa Rehiyon I at II, at CAR, ngunit ito ay kasalukuyang humupa na, nagkaroon din ng pagtala ng mga bahagyang pagkasira ng mga tahanan dahil dito.
Mayroon ding limang iniulat na hindi madaanang mga seksyon ng kalsada, ngunit sinabi ni Alejandro na patuloy ang clearing operations dito.
Noong Biyernes, lumabas si Bising sa Philippine Area of Responsibility (PAR).
Ito ay naging isang severe tropical cyclone nitong Sabado ng gabi at inaasahang maging ganap na typhoon sa Linggo.
Sinabi ng PAGASA na maaaring muling pumasok ang Danas sa PAR sa Linggo ng gabi o sa Lunes ng madaling araw, at maglandfall sa mainland China sa Martes.
Ang labangan ng Danas ay nakakaapekto sa Extreme Northern Luzon sa Linggo, na nagdadala ng maulap na kalangitan na may kalat-kalat na pag-ulan at pagkidlat-pagkulog sa Batanes at Babuyan Islands. Ang katamtaman hanggang sa kung minsan ay malakas na pag-ulan ay maaaring magresulta sa flash flood o landslide.
Alas-3 ng umaga ng Linggo, ang Danas ay nasa layong 400 km kanluran ng Itbayat, Batanes, taglay ang lakas ng hanging aabot sa 110 km/h malapit sa gitna at may pagbugsong aabot sa 135 km/h.
Ang Danas ay gumagalaw pahilaga hilagang-silangan patungo sa Taiwan. RNT/MND
