MANILA, Philippines – Humiling ang Metropolitan Manila Development Authority (MMDA) ng karagdagang P5.4 bilyong pondo para sa 2026 upang pondohan ang pagtatayo ng tatlong rainwater catchment facilities na layong mapigilan ang pagbaha sa Metro Manila.
Ayon kay MMDA Chair Romando Artes, plano nilang magtayo ng pasilidad sa Camp Aguinaldo sa Quezon City at sa dalawang lokasyon sa Maynila. Ito ay sa Rizal Memorial Coliseum at Rizal Park.
Tinatayang aabot sa P1.5 bilyon ang halaga ng proyekto sa Camp Aguinaldo, P2.2 bilyon sa Rizal Memorial, at P1.7 bilyon sa Rizal Park.
“We would like to request an amendment to our budget to fund at least three rain catchment facilities, which we believe will have a significant impact in addressing flooding,” pahayag ni Artes sa pagdinig ng Senate finance subcommittee nitong Huwebes, Oktubre 16.
Ang hirit na pondo ay hiwalay pa sa P5.8-bilyong budget proposal ng MMDA para sa 2026 at wala sa National Expenditure Program.
Ayon kay Artes, maaari umanong matapos ang mga pasilidad sa loob lamang ng isang taon.
Bilang halimbawa, binanggit niya ang Singapore, na dati’y nakararanas ng malalalim na baha sa Orchard Road bago maitayo ang kanilang catchment system.
“So we want to replicate it. We had it studied, and the Singaporean government kindly agreed to assist us,” dagdag ni Artes.
Sa Pilipinas, planong magtayo ng 10 metrong lalim o tatlo hanggang apat na palapag na rainwater catch basins na matibay at earthquake-resilient, ayon sa MMDA.
Samantala, sinabi ni Sen. JV Ejercito na “worth considering” ang panukala ngunit aminadong nagdadalawang-isip ang publiko sa mga flood-control projects.
“Whenever we mention flood control projects, they’re immediately rejected. But there should be exemptions—especially for those that are truly necessary,” ani Ejercito. RNT/JGC
