Navotas inilunsad ang PhilHealth YAKAP para sa mga mag-aaral

NAVOTAS CITY — Inilunsad ni Mayor John Rey Tiangco ang PhilHealth “Yaman ng Kalusugan Program (YAKAP) para sa mga Mag-aaral” sa Kapitbahayan Elementary School, na sasaklaw sa 44,301 mag-aaral mula elementarya hanggang senior high school sa mga pampublikong paaralan.

Noong Oktubre 2025, 91% ng 250,000 residente ng Navotas ay nakatala sa YAKAP, pinakamataas sa Metro Manila, ayon sa PhilHealth.

Binigyang-diin ni Mayor Tiangco ang kahalagahan ng preventive healthcare: “Ang kalusugan ng kabataan ay yaman ng ating lungsod. Our students cannot learn well when they are sick. Kapag ligtas at malusog ang bata, mas nagiging handa sila para sa kinabukasan.”

Kasama sa YAKAP ang libreng konsultasyon, hanggang P20,000 halaga ng gamot, mga pagsusuri sa laboratoryo, cancer screening, at iba pang pangunahing serbisyo sa kalusugan. Dumalo sa paglulunsad sina PhilHealth Caloocan head Brian Florentino, Dr. Gemma Villaluna, at Dr. Charmaine Nagayo.

Kinilala na rin ang Navotas ng PhilHealth bilang Universal Health Care Champion in Governance at YAKAP Champion para sa pinakamataas na compliance at accredited clinics.