SA kabila ng mga pagsubok sa ekonomiya, patuloy ang pag-arangkada ng Metro Pacific Investments Corp. matapos magtala ng 14% pagtaas sa kanilang consolidated core income na umabot sa P23.6 bilyon sa unang siyam na buwan ng taon.
Sa gitna ng lahat, nananatiling hari ang negosyo sa kuryente — na nag-ambag ng P17.6 bilyon o 65% ng kabuuang kita.
Bagamat bumaba ng 7% ang kanilang reported income dahil sa kawalan ng one-time gain na naitala noong nakaraang taon, hindi ito naging hadlang para ipagdiwang ng grupo ang tibay ng kanilang pangunahing negosyo.
“Power at tubig ang patuloy na bumubuhay sa ating operasyon,” ani MPIC chairman Manny Pangilinan. “Habang ang toll roads ay unti-unting bumabangon mula sa epekto ng mataas na gastos sa financing.”
Hindi rin nagpapahuli ang Meralco, na naghatid ng P40 bilyong kita — 14% na pagtaas — bunsod ng malakas na performance sa generation at distribution.
Sa kabilang banda, ang Maynilad ay nagdiwang ng 18% pagtaas sa core income, kasabay ng matagumpay na pagpasok nito sa stock market na kumita ng P34.3 bilyon mula sa mga mamumuhunan.
Ang tanong: Sa gitna ng mga numerong ito, ramdam ba ng karaniwang Pilipino ang sinasabing “resilience” ng mga negosyo sa kuryente at tubig? Habang lumalaki ang kita ng mga higanteng korporasyon, nananatiling hamon pa rin para sa marami ang mataas na singil sa kuryente at tubig.
Kung tunay ngang layunin ng MPIC na “mag-reinvest para sa mas maayos na serbisyo,” gaya ng sinabi ni Pangilinan, sana’y maramdaman ito sa bawat gripo at switch ng pamilyang Pilipino.
