MANILA, Philippines – Hinimok ng iba’t ibang transport groups si Pangulong Ferdinand “Bongbong” R. Marcos, Jr. na ipatupad ang fare hike na inaprubahan kamakailan ng Land Transportation Franchising and Regulatory Board (LTFRB) para sa lahat ng public utility vehicles (PUVs).
Nauna rito noong Marso ngayong taon, inaprubahan ng LTFRB ang pagtaas ng pamasahe para sa pampasaherong jeepney, TNVS, taxi at mga pampasaherong bus, na binanggit ang serye ng big-time na pagtaas ng presyo ng langis.
Gayunpaman, ipinagpaliban ni Pangulong Marcos ang pagpapatupad, at sinabing hindi ito napapanahon dahil noong panahong iyon, ang rurok ng armadong tunggalian sa pagitan ng Iran at Estados Unidos ang nakaapekto sa mundo, partikular ang mga bansang nag-aangkat ng langis tulad ng Pilipinas.
Kaugnay nito sa isang liham na ipinadala kay Pangulong Marcos, hindi bababa sa anim na transport groups ang humimok sa Punong ehekutibo na ipatupad ang ipinagpaliban na pagtaas ng pamasahe, lalo na sa gitna ng kamakailang anunsyo ng pagtaas ng sahod.
“Kami po, mga lider ng iba’t ibang grupo sa hanay ng pampublikong transportasyon, ay humihingi ng hindi ninyo alam na kailangan namin ang pagtaas ng pamasahe,” ayon sa grupo ng transport.
“Patuloy pa rin ang mataas na presyo ng krudo, ang presyo ng bilihin umaakyat na rin, spare parts, at ngayon pati minimum wage nadagdagan na. Kami na lang po ang napagiwanan,” dagdag pa ng grupo.
Ang liham ay nilagdaan ni Pasang Masda National President Ka Obet Martin, ALTODAP National President Boy Vargas, BUsina National President Marlyn dela Cruz, PGTP Transport Service President Danilo Montales, DELMAROD Transport Coop President Melchor Pascual at CAPAODA Transport Coop President Luicito Villa.
“Ang subsidiyang binigay ay tunay na nakatulong at aming pinasasalamatan, ngunit panandalian lamang at kulang pa rin sa araw-araw na gastusin,” sabi ng transport groups.
“Mr. President sana po mapagbigyan nyo ang aming hiling. Ituloy na po natin ang fare adjustment sa pampublikong sasakyang panlupa,” dagdag pa nila.
Dahil babalik na sa normal ang sitwasyon, ipinaliwanag din ni PBOAP Executive Director Alex Yague na wala nang dahilan para ipagpaliban pa ang pagpapatupad ng fare hike.
Samantala bagaman nakatulong ang tulong-pinansyal at ang kasalukuyang fuel subsidy na nagbibigay ng diskwento na P10 bawat litro, sinabi ni Yague na nananatili ang katotohanang hindi na babalik sa dating presyo—bago ang kaguluhan sa Middle East—ang halaga ng diesel na ginagamit ng mga bus.
Idinagdag niya na hindi na maaaring katwiranin ng gobyerno na napapanahon ang taas-pasahe dahil bumabalik na sa normal ang sitwasyon.
Sinusuportahan ng iba pang grupo ng transportasyon ang pahayag ni Yague.
Kaugnay nito binanggit din nina Vargas ng ALTODAP at Martin ng Pasang Masda ang kamakailang anunsyo ng Department of Labor and Employment (DOLE) tungkol sa P85 na dagdag-sahod kada araw para sa mga manggagawa sa Metro Manila bilang dahilan ng kanilang pagsusulong sa pagpapatupad ng taas-pasahe. (Santi Celario)
