MANILA, Philippines — Magpapatuloy ngayong Miyerkules, Hulyo 22, 2026, ang pagtestigo ni National Bureau of Investigation (NBI) Director Melvin Matibag sa ika-9 na araw ng impeachment trial ni Vice President Sara Duterte.
Naputol noong Martes ang cross-examination ng depensa matapos itong humiling ng dagdag na oras upang makapaghanda ng mga tanong, dahil may bagong dokumentong iniharap ang prosecution na may kaugnayan sa ibang artikulo ng impeachment.
Kabilang sa dokumento ang affidavit ng dating Davao Death Squad member at pulis na si Arturo Lascañas, na ginamit ni Matibag upang tukuyin ang umano’y “pattern of violence” ni Duterte na bahagi ng imbestigasyon ng NBI sa umano’y pagbabanta laban kay Pangulong Ferdinand Marcos Jr.
Maglalabas din ang Senate impeachment court ng mga bagong subpoena para sa mga unang testigo sa Article I, na tumatalakay sa umano’y maling paggamit ng confidential funds ni Duterte.
Kabilang sa mga testigo sina Marivic Pareja, Violeta Constantino, at Nenita Camposano. Bagama’t una silang pinatawag para humarap ngayong Miyerkules, ipinagpaliban muna ang kanilang pagdalo dahil sa pagpapatuloy ng cross-examination kay Matibag. RNT/MDS
