Higpit-seguridad sa SONA 2026, ipinatupad

MANILA, Philippines – Hinigpitan ang seguridad sa paligid ng Batasang Pambansa Complex, Batasan Road, at Commonwealth Avenue sa Quezon City bago ang ikalimang State of the Nation Address ni Pangulong Ferdinand “Bongbong” Marcos Jr. nitong Lunes, Hulyo 27, 2026.

Nakatakdang ihayag ni Marcos ang kanyang SONA alas-4 ng hapon sa plenary hall ng House of Representatives.

Maaga pa lamang noong Linggo ng gabi ay nakapuwesto na sa mahahalagang lugar ang mga tauhan ng Philippine National Police, Bureau of Fire Protection, Metropolitan Manila Development Authority, at Presidential Security Command.

Mahigit 900 tauhan ng PNP at BFP ang itinalaga malapit sa kanto patungo sa Batasang Pambansa Complex. Nakapuwesto naman malapit sa Sandiganbayan, sa kanto ng Commonwealth Avenue at Batasan Road, ang mga tauhan ng MMDA, ambulansiya, at mobile command center.

Ipinatupad ang mahigpit na inspeksiyon sa mga sasakyang pumapasok sa complex, kabilang ang manual at X-ray inspection. Nag-ikot din sa lugar ang mga K9 unit ng PNP Explosives and Ordnance Division.

Sa Philcoa sa Commonwealth Avenue, nasa 300 pulis ang itinalaga sa eastbound lane makalipas ang alas-6 ng umaga. Naglagay din sa lugar ng tent, command center, at limang firetruck.

Inaasahang magtitipon sa Commonwealth Avenue ang mga grupong magsasagawa ng kilos-protesta. Nakatakdang magdaos ng rally ang BAYAN Southern Tagalog alas-7 ng umaga, kasunod ang BAYAN Central alas-8 ng umaga sa harap ng Department of Agrarian Reform.

Nanawagan ang PNP sa mga raliyista na panatilihing mapayapa ang kanilang mga protesta at tiniyak na paiiralin ng mga pulis ang maximum tolerance.

Mahigit 20,000 pulis ang ipinakalat para sa SONA 2026, habang isinailalim sa full alert ang National Capital Region Police Office.

Nanatiling tahimik at mapayapa ang paligid ng Batasang Pambansa magdamag. Maagang bumiyahe ang ilang commuter upang maiwasan ang inaasahang mabigat na trapiko. Santi Celario