SA kabila ng mga puna at batikos na ibinabato sa pamahalaan, nananatiling nakatuon ang Department of Migrant Workers sa pangunahing misyon nito—ang pangalagaan ang kapakanan ng mga overseas Filipino workers, lalo na sa panahon ng kaguluhan sa Gitnang Silangan.
Sa direktiba ni Pangulong Ferdinand Marcos Jr., pinaigting ng DMW ang mga hakbang upang matiyak ang kaligtasan, proteksyon, at agarang pag-uwi ng mga OFW na naapektuhan ng tensyon at armadong sigalot sa rehiyon.
Patunay ito na sa gitna ng krisis, hindi humihinto ang pamahalaan sa pagbibigay ng kinakailangang tulong sa mga Pilipinong nagtatrabaho sa ibayong dagat.
Malaki ang naging pasasalamat ng maraming OFW sa maagap na pagtugon ng DMW at iba pang ahensya ng gobyerno. Mabilis na naasikaso ang kanilang mga travel documents, napadali ang proseso ng repatriation, at naipagkaloob ang iba pang serbisyong kinakailangan upang matiyak ang kanilang ligtas na pagbabalik sa bansa.
Hindi rin nag-iisang kumilos ang pamahalaan. Nagtulungan ang iba’t ibang sektor, kabilang ang recruitment agencies, pribadong kompanya, volunteer groups, mga bangko, at insurance companies upang mapalawak ang tulong para sa OFWs at kanilang mga pamilya sa panahon ng pangangailangan.
Kabilang sa pinakamahalagang programa ng DMW ang Repatriation Assistance, kung saan ilang ulit nang pinondohan ng pamahalaan ang chartered at commercial flights upang mailikas at maiuwi sa Pilipinas ang mga OFW at kanilang mga mahal sa buhay mula sa mga lugar na apektado ng kaguluhan.
Bukod dito, patuloy ding ipinagkakaloob ang Financial and Reintegration Support para sa mga nagbabalik na OFW. Kabilang dito ang pinansyal na ayuda, mga programang pangkabuhayan, pagsasanay sa iba’t ibang kasanayan, at iba pang serbisyong magbibigay sa kanila ng pagkakataong makapagsimulang muli at magkaroon ng matatag na kabuhayan sa Pilipinas.
Ang tunay na sukatan ng isang pamahalaan ay ang kakayahan nitong kumilos sa oras ng pangangailangan. Sa patuloy na pagpapatupad ng mga programang ito, ipinakikita ng DMW na nananatiling prayoridad ang kapakanan, kaligtasan, at kinabukasan ng bawat OFW—mga bagong bayaning patuloy na nagsasakripisyo para sa kanilang pamilya at sa ekonomiya ng bansa.
