DALAWANG Linggo na ang nakalipas, noong Hulyo 19, kumalat ang mga screenshot ng chat thread na umano’y nagpaplano ng sabayang pag-atake ng ilang tila na-radikalisa na kabataan sa tatlong pampublikong paaralan sa Quezon City — Flora Ylagan High School sa Diliman, Ramon Magsaysay High School sa Cubao, at Quirino High School sa Project 3.
Hindi lamang pagtukoy sa target ang laman ng usapan, kundi pati ang pananakit sa sinomang makasalubong. Kabilang pa rito ang larawan ng combat knife at usapan tungkol sa paggamit ng baril.
Itinakda umano ang Lunes, Hulyo 20, bilang araw ng pag-atake, dahilan upang magtaas ng alerto ang mga paaralan. Naka-plainclothes ang mga pulis, nagkalat ang mga barangay tanod, sinuri ang mga bag, at pinalawak ang seguridad.
Totoo man o hindi ang banta, malinaw ang takot na idinulot nito sa mga estudyante at magulang.
Hindi ito basta hiwalay na insidente. Matagal ko nang binabanggit ang landas patungo rito: mga online subculture na humuhubog sa kabataan sa pamamagitan ng gaming communities at social media, pinapakain sila ng karahasan at kawalang-pag-asa hanggang sa ang ilan ay kumilos.
Ang pamamaril sa paaralan sa Tacloban nitong Hunyo — na kumitil sa tatlong buhay at ikinasugat ng 20 — ang patunay. Natunton ang mga suspek sa matagal na exposure sa marahas na content at sa larong GoreBox.
Ang nangyari sa Quezon City ay tila parehong apoy na nakahanap lang ng bagong sisindihan. Kaya’t mahalagang pagtuunan ang panukala ng Philippine National Police.
Matapos ang ASEANAPOL conference sa Pasay, sinabi nina PNP Chief PGen. Jose Melencio Nartatez Jr. at Police Regional Office 4A Director PBGen Matthew Baccay na pinag-aaralan ang batas ng Australia na nagbabawal sa social media para sa mga edad 16 pababa.
Isa itong matinding hakbang, ngunit marahil ito ang kailangan ng panahon. Nasubukan na natin ang awareness campaigns, guidance counseling, at hotlines. Ngunit ang mga algorithm na nakatuon sa engagement ay patuloy na nagtutulak sa mga kabataan patungo sa radikalisasyon — mas mabilis kaysa kayang pigilan ng paaralan.
Hindi nito malulutas ang lahat, at tiyak na may tututol — lalo na ang mga industriyang kumikita sa atensyon ng kabataan. Ngunit mahalaga ang malinaw na hangganan.
Hindi dapat hayaang maantala ito sa Kongreso. Bawat linggong pag-aatubili ay isa pang linggong iniiwan ang mga bata sa awa ng mga algorithm na walang pakialam sa kanilang kapakanan. Kung hindi kikilos ang Big Tech, kailangang gawin ito ng pamahalaan.
* * *
SHORT BURSTS. Para sa mga komento o reaksyon, mag-email sa [email protected] o mag-post sa @Side_View sa X app (dating Twitter).
