NEGROS OCCIDENTAL — Dinagsa ng mga volleyball fan ang 2026 Premier Volleyball League (PVL) On Tour finale na ginanap sa Victorias City Coliseum noong Agosto 22.
Ito ang kauna-unahang major professional sporting event na idinaos sa lungsod sa loob ng halos 15 taon. Kabilang sa mga nanood sina Sen. JV Ejercito, Negros Occidental 3rd District Rep. Javier Miguel Benitez at mga opisyal ng Victorias City at pamahalaang panlalawigan.
Sa unang laro, bumangon ang Farm Fresh Foxies upang talunin ang Capital1 Solar Spikers sa limang sets, 20-25, 25-19, 22-25, 25-12, 15-10.
Tinalo naman ng Creamline Cool Smashers ang Galeries Tower Highrisers sa straight sets, 25-21, 25-16, 25-21, sa main game. Tampok sa laban ang paglalaro ni Jaja Santiago-Minowa para sa Creamline.
“We hope that the next time an event like this comes to Victorias, a Victoriasanon player will be part of it,” pahayag ni Benitez.
Pinasalamatan din ng kongresista ang PVL, Sports Vision, pamahalaang lungsod sa pangunguna ni Mayor JunB Bantug, GRID Sports Athletic na pinamumunuan ni Bea Tan, mga koponan at mga tagahangang nanood.
Isinapormal ang pagho-host sa pamamagitan ng memorandum of agreement sa pagitan ng Victorias City government at GRID Sports Athletic.
Huling nag-host ang lungsod ng isang major professional league event noong Oktubre 2011 para sa mga laro ng Philippine Basketball Association.
Sa Victorias City nagtapos ang 2026 PVL On Tour, na nagsimula noong Hulyo 8 at idinaos sa iba’t ibang lugar sa labas ng Metro Manila.
