OLONGAPO CITY, Philippines – Idineklarang state of calamity ang Olongapo City nitong Martes dahil sa ilang linggong matinding pag-ulan na nagdulot ng malawakang pagbaha, landslide, pagkasira ng mga ari-arian at imprastraktura, at paglikas ng mga residente.
Inaprubahan ng City Council ang Resolution No. 196, Series of 2026, batay sa rekomendasyon ng Olongapo City Disaster Risk Reduction and Management Council (OCDRRMC), na nagpatibay ng Resolution No. 2026-04 sa emergency meeting nito noong Lunes.
Ayon kay Mayor Rolen C. Paulino Jr., umabot sa 2,900.5 millimeters ang kabuuang ulan sa lungsod noong Agosto—humigit-kumulang 3.47 beses ng normal na 835.7 mm na pag-ulan para sa buwan. Mula Agosto 28 hanggang 29 lamang, nakapagtala ng 569.5 mm na ulan, katumbas ng halos 68% ng normal na ulan sa buong Agosto.
Dahil sa tuloy-tuloy na malakas na ulan, nakaranas ang lungsod ng pagbaha, landslide, pinsala sa ari-arian at imprastraktura, pagkasira ng kapaligiran, pagkaantala sa transportasyon at serbisyong publiko, at paglikas ng mga residente.
Ayon kay Jeffrey Lapid, hepe ng Olongapo City Disaster Risk Reduction Management Office, 13 sa 17 barangay ng lungsod ang binaha noong Agosto 29. Umabot sa 730 pamilya o 2,530 indibidwal ang lumikas mula sa kanilang mga bahay. Isang 3-anyos na batang lalaki mula Barangay Old Cabalan ang nasawi matapos tangayin ng rumaragasang baha nang biglang gumuho ang pader sa ibabaw ng kanilang bahay.
Sinabi ng pamahalaang lungsod na malaki rin ang naging epekto ng sunod-sunod na sama ng panahon sa normal na aktibidad panlipunan at pang-ekonomiya, habang nadagdagan ang trabaho para sa disaster response, recovery at public services.
Inaasahang makatutulong ang deklarasyon ng state of calamity upang agad na magamit at maipakilos ang mga available na resources para sa response, relief, recovery at rehabilitation ng mga apektadong residente, komunidad, ari-arian at imprastraktura. Patuloy na bumabangon ang Olongapo at iba pang bahagi ng Zambales mula sa paulit-ulit na pagbaha at epekto ng matinding pag-ulan nitong mga nakaraang linggo. RNT/MDS
