HINIMOK ng Department of Environment and Natural Resources (DENR) ang mga pamahalaan sa Southeast
Asia na direktang isama ang kanilang mga pangako sa pagtugon sa climate change sa pambansang badyet
at mga planong pang-ekonomiya upang matiyak na maisasalin ang mga ito sa mga konkretong
pamumuhunan at programa.
Sa kanyang talumpati sa Session 3 ng ASEAN-EU High-Level Dialogue on Financing the Green Transition
sa 31st Conference of the Parties (COP31), binigyang-diin ni DENR Undersecretary for Administration,
Finance, Information Systems, and Climate Change Analiza Rebuelta-Teh na ang mga patakarang
pangkalikasan ay dapat makita sa paggastos ng gobyerno at mga proyektong pang-impraestruktura, sa
halip na manatiling hiwalay na dokumento.
"Ang climate change ay lalong humuhubog sa mga pagpipiliang pang-ekonomiya na bukas para sa ating
mga bansa," pahayag ni Teh.
Pagtutugma ng Badyet at Pagbabantay sa Pondo
Binigyang-diin ng opisyal ang pangangailangan para sa mas mahigpit na koordinasyon sa pagitan ng mga
ahensiyang pangkalikasan at ng mga kagawaran sa pananalapi (finance), pagpaplanong pang-ekonomiya,
at mga sektor ng pag-unlad. Para sa mga umuunlad na ekonomiya, nangangahulugan ito ng pagtutugma ng
Nationally Determined Contributions (NDCs) at National Adaptation Plans (NAPs) sa mga regular na
proseso ng paggastos ng pamahalaan.
Iminungkahi rin ni Teh ang paggamit ng mga sumusunod na mekanismo bilang bahagi ng regular na
proseso ng badyet upang masubaybayan kung paano nakatutulong ang pondo ng bayan sa mga layuning
pangkalikasan:
Climate budget tagging
Climate expenditure reviews
Performance audits
Pagtutulungan ng mga Sektor at Paghikayat sa Pamumuhunan
Nanawagan din ang opisyal ng DENR para sa mas maayos na ugnayan sa pagitan ng mga ahensiya sa
enerhiya, transportasyon, agrikultura, tubig, impraestruktura, at pangangasiwa sa likas na yaman,
mula sa pagtukoy ng mga prayoridad na proyekto hanggang sa pagpapatupad nito.
Bukod dito, binigyang-diin niya ang pagpapalakas sa kakayahan ng mga bansa sa pagsasagawa ng
feasibility assessments, pagtatakda ng environmental safeguards, at maagang pakikipag-ugnayan sa mga
institusyong pinansyal at pribadong mamumuhunan. Maaaring gamitin ang mga mekanismong tulad ng
guarantees, concessional financing, at blended finance upang mahikayat ang pribadong kapital.
Gayunpaman, iginiit ni Teh na nananatiling mahalaga ang public financing para sa mga proyektong
naghahatid ng direktang benepisyo sa mga komunidad kahit hindi ito nagbibigay ng malaking kita sa
negosyo.
Kooperasyon ng ASEAN at European Union
Sa antas rehiyonal, sinabi ni Teh na maaaring magtulungan ang mga miyembro ng Association of
Southeast Asian Nations (ASEAN) sa pagpapalitan ng kaalaman at pagtukoy ng mga proyektong
magkakaugnay tulad ng cross-border energy connectivity, sustainable transport, at climate-resilient
infrastructure.
Binigyang-diin din niya ang oportunidad sa pakikipagtulungan sa European Union (EU) upang
makapagbigay ng teknikal na kadalubhasaan at mapag-ugnay ang mga prayoridad ng bansa sa mga
development finance institutions—bilang paghahanda na rin sa ika-50 anibersaryo ng ugnayang ASEAN-EU
sa taong 2027.






