MANILA, Philippines- Naghain ang Philippine National Police-Criminal Investigation and Detection Group (PNP-CIDG) nitong Huwebes ng sedition at inciting to sedition complaint laban kay Atty. Israelito Torreon, ang legal counsel ni Kingdom of Jesus Christ (KOJC) founder Apollo Quiboloy, at 11 iba pa.
Inihain ni Police Brigadier General Nicolas Torre III, acting director ng PNP-CIDG, ang reklamo sa Department of Justice (DOJ) kaugnay ng pagsisilbi ng arrest warrants laban kay Quiboloy sa KOJC compound noong Agosto.
“Nakita niyo naman, the government is serving a warrant of arrest against the five fugitives and they are preventing us from doing so,” pahayag ni Torre sa isang panayam.
Kabilang sa respondents ang SMNI anchors na sina Lorraine Badoy at Jeffrey Celis.
Sinubukang kunan ng komento sina Torreon at Badoy subalit sa kasalukuyan ay wala pang natatanggap na tugon.
Iginiit naman ni Celiz na ang reklamo ay “baseless and ridiculous.”
“The complaints allege that I engaged in actions that undermine national stability, among other incredible allegations which I find blatantly exaggerated and misaligned with the principles of genuine free speech and free expression in a democratic country like the Philippines,” pahayag niya.
Nang tanungin ukol sa pagkakasangkot sa iba pang respondents, sinabi ni Torre na kinasuhan sila dahil sa umano’y panawagan sa mga taga-suporta na magkaisa laban sa pamahalaan.
“Initially, ang mga in-allege natin doon, ang kanilang mga ginawa like calling on the people to rise against the government, to prevent the police from serving the warrant of arrest, and many others,” wika ng opisyal.
Matatandaang nagkaroon ng tensyon sa pagitan ng mga pulis at KOJC members noong Agosto nang tangkain ng law enforcers na magsilbi ng arrest laban kay Quiboloy sa KOJC compound sa Davao City.
Sinabi ng dalawang kampo na ilan sa kani-kanilang miyembro ang nasugatan sa implementasyon ng warrants.
Kinasuhan ng KOJC members ang ilang pulis dahil sa paggamit umano ng tear gas. Subalit, ayon kay Torre, ang KOJC members ang gumamit ng fire extinguisher sa mga pulis.
Nagsampa rin ang PNP ng obstruction of justice at direct assault complaints laban sa KOJC members.
Sumuko si Quiboloy sa mga awtoridad noong Setyembre matapos bigyan ng ultimatum. RNT/SA
