MANILA, Philippines – Pinayagan ng Cebu provincial government ang pagbiyahe ng mga buhay na baboy para sa lechon production sa ilalim ng mga protocol at biosecurity requirements.
Nag-isyu si Governor Pamela Baricuatro ng Executive Order (EO) No. 55 noong Oktubre 26 na nagpapahintulot sa pagpasok ng mga baboy na para sa produksyon ng lechon.
Pinapayagan ng polisiya ang mga lechon producer na kumuha ng buhay na baboy sa labas ng Cebu basta’t may government clearance at pananatilihin ang restriksyon para maiwasan ang pagkalat ng African swine fever (ASF).
Iginiit sa EO na ang mga baboy ay dapat na agad katayin ng akreditadong pasilidad sa Cebu, basta’t ang mga kargamento ay tumutugon sa veterinary quarantine at animal health regulations.
“These hogs must not be kept for breeding or resale, but must go straight to the slaughterhouse as declared in their documents,” dagdag pa.
Dapat ding dumaan ang lahat ng mga kargamento sa official ports na may veterinary quarantine na mag-iinspeksyon sa mga hayop.
Kabilang naman sa kailangang dokumento na maipakita ay ang valid shipping permits mula sa Bureau of Animal Industry (BAI), veterinary health certificates, laboratory results na nagpapakita ng negative ASF RT-PCR findings, at meat inspection certificates.
Dapat din na may disinfection certificates ang mga sasakyan.
“Shipments lacking complete documentation, failing to specify an NMIS-accredited slaughterhouse destination, or bypassing designated quarantine seaports shall be confiscated and deemed forfeited, or returned to their point of origin.”
Matatandaan na nagpatupad noong Hulyo si Baricuatro ng total ban sa imported live hogs at pork products dahil sa pagbabalik ng mga kaso ng ASF sa mga karatig-lugar. RNT/JGC
