Manila, Philippines – Maaaring masampahan ng kaso ang aktor at dating Overseas Workers Welfare Administration (OWWA) Administrator na si Arnell Ignacio kaugnay ng diumano’y anomalya sa P1.4-billion land acquisition deal.
Kinumpirma ni Malacañang Press Officer Claire Castro na mayroong naipadalang letter of complaint laban kay Arnell sa Office of the President.
Kasalukuyang iniimbestigahan ang kontrobersyal na transaksyon ng OWWA, na di umano’y nilabag ang tamang proseso dahil hindi umano ito aprubado ng Board of Trustees ng ahensiya bago ipatupad.
Ayon naman kay Department of Migrant Workers Secretary Hans Cacdac, hindi nag-resign si Arnell Ignacio mula sa OWWA kundi tinanggal dahil sa naturang kontrobersyal na deal.
Si Arnell ay nagsilbing OWWA administrator noong 2022 matapos na italaga bilang deputy administrator noong 2018 sa ilalim ng administrasyon ni dating Pangulong Rodrigo Duterte.
Sa isang panayam sa telepono, sinabi ni Arnell na nakatakda niyang harapin at sagutin ang mga paratang sa “proper forum.”
Aminado rin siya na nagulat siya sa mga akusasyon laban sa kanya. Jimi Escala
