MANILA, Philippines – May bagong ulat ng pag-atake sa isang barko sa Strait of Hormuz nitong Linggo, kasunod ng pagsasara ng Saudi Arabia sa isang mahalagang oil pipeline dahil sa drone attack.
Ayon sa UK Maritime Trade Operations (UKMTO), isang projectile ang tumama sa isang barko habang naglalayag sa Strait of Hormuz. Hindi pa malinaw ang lawak ng pinsala at kalagayan ng mga tripulante.
Naganap ito isang araw matapos pansamantalang isara ng Saudi Arabia ang 1,200-kilometrong East-West pipeline bilang pag-iingat matapos ang drone attack na sinabing nagmula sa Iraq, kung saan kumikilos ang mga grupong suportado ng Iran.
Ang pipeline ay dating nagdadala ng nasa 4 hanggang 5 milyong bariles ng langis kada araw, katumbas ng humigit-kumulang 4 hanggang 5 porsiyento ng global supply.
Wala pang umaako sa pag-atake sa pipeline. Ayon sa Saudi Foreign Ministry, may mga nasugatan at napinsalang bahagi ng pipeline, habang iniimbestigahan pa ang epekto nito sa oil exports.
Samantala, patuloy na tumataas ang presyo ng langis dahil sa lumalawak na kaguluhan sa Middle East. Umakyat muli sa higit $100 kada bariles ang Brent crude nitong nakaraang linggo.
Humingi rin umano ng tulong militar sa Estados Unidos si Saudi Crown Prince Mohammed bin Salman upang labanan ang Houthis sa Yemen. Sinabi ni US President Donald Trump na hindi muna direktang makikialam ang Washington ngunit maaaring magbigay ng intelligence support.
Iniulat din na nakontrol ng Houthis ang strategic island ng Perim sa Bab el-Mandeb Strait, isang mahalagang ruta ng oil at shipping sa bunganga ng Red Sea.
Samantala, nakatakdang dumalo ang Iran sa isang pagpupulong kasama ang mga Gulf Arab states sa Oman sa Lunes upang talakayin ang Strait of Hormuz. Gayunman, isang senior Iranian official ang nagpababa sa posibilidad ng agarang kasunduan.
Iginiit naman ng Iran na hindi muling bubuksan ang Strait of Hormuz hangga’t hindi natutupad ang mga kondisyon nito, kabilang ang pagkilala sa kontrol nito sa estratehikong daanan—isang posisyong tinututulan ng Estados Unidos. RNT/MDS
