MANILA, Philippines – Patay ang 26-anyos na bebot matapos pagbabarilin hindi kilalang salarin na kanyang nakasalubong habang naglalakad sa Caloocan City, Miyerkules ng gabi.
Wala ng buhay ang biktimang residente ng 619 Aurora St. Barrio Concepcion, Brty. 188 Tala, North Caloocan nang datnan ng mga nagrespondeng tauhan ng Caloocan Police Sub-Station 14 habang nakahandusay sa Langit Road, Barrio San Isidro, Brgy. 188 Tala.
Batay sa ulat ng tanggapan ni Northern Police District (NPD) Director Benliner Capili, naglalakad sa Langit Road ang biktima dakong alas-6:15 ng gabi nang tatlong beses umanong paputukan sa ulo at katawan ng nakasalubong niyang salarin.
Ilang saksi ang nakakita sa suspek na nakasuot ng itim na jacket, itim na cap, puting pantalon, at puting sapatos na nagmamadaling tumakas patungo sa Phase 5, Brgy 176 Bagong Silang, bitbit ang ginamit na armas.
Ayon sa isang opisyal ng barangay, kilala sa kanilang lugar ang biktima bagama’t hindi siya residente ng kanilang barangay kundi pasulpot-sulpot lang.
Patuloy ang isinasagawang imbestigasyon ng pulisya at nagsasagawa na rin ng backtracking sa kuha ng mga CCTV sa lugar upang matukoy ang pagkakilanlan ng salarin habang inaalam pa ang motibo sa pamamaslang. (Merly Duero)
