Bong Go: Lokal, maliliit na negosyo suportahan

MANILA, Philippines- Sa opisyal na pagsisimula ng campaign period noong Pebrero 11, ginugol ni Senator Christopher “Bong” Go ang kanyang oras sa pakikisalamuha sa mga may-ari ng maliliit na negosyo at street vendors sa Davao City.

Binigyang-diin ng senador ang kahalagahan ng pagsuporta sa mga lokal at maliliit na negosyante. 

Kilala sa kanyang direktang pakikipag-ugnayan sa publiko, naglaan si Senator Go ng oras upang tingnan ang mga vendor na nagbebenta ng pagkain sa mga lansangan kasabay ng panawagan na tulungan ang maliliit na negosyo para umunlad.  

“Tangkilikin natin ang mga negosyante, maliliit na negosyante. Tulungan po natin sila,” hikayat niya sa publiko bilang paraan upang umangat ang kabuhayan ng bawat isa. 

Bukod sa pakikisalamuha sa street vendors, sinamantala rin ni Senator Go, chairperson ng Senate committee on youth, ang pakikipag-usap sa mga estudyante sa lugar. 

Ang kanyang pakikipag-usap sa mga kabataan ay nakatuon sa mga adhikain at hamon, na lalong nagpapatibay sa kanyang adbokasiya para sa edukasyon at mga programang pangkapakanan na pakikinabangan ng mga kabataang Pilipino.  

Kinagabihan, dumalo si Senator Go sa League of Municipalities of the Philippines General Assembly sa Manila Hotel. 

Sa pagtitipon na ito ng mga lokal na opisyal, tinalakay niya ang kahalagahan ng paglalapit ng mga serbisyo ng gobyerno sa mga tao, partikular na ang mga mula sa marginalized na komunidad.

Nananatili si Senator Go sa kanyang pangako sa pagtiyak na ang bawat Pilipino ay may access sa matatag at marangal na trabaho, gayundin ang suporta para sa mga maliliit na may-ari ng negosyo. 

Patuloy niyang isinusulong ang pagpasa at wastong pagpapatupad ng mga pangunahing hakbang sa lehislatura na nagtataguyod ng patas na sahod, seguridad sa trabaho, at suporta sa kabuhayan—pagtiyak na walang Pilipinong maiiwan sa pagbangon at pag-unlad ng ekonomiya ng bansa.  

Ang isang pangunahing inisyatiba sa kanyang agenda ay ang Senate Bill No. 420, o ang Rural Employment Assistance Program (REAP), na naglalayong magbigay ng pansamantalang trabaho para sa mga displaced at seasonal workers. RNT