CAVITE, Philippines – Malapit nang matapos ng MPCALA Holdings, Inc. ang Cavite-Laguna Expressway (CALAX), isang 45-kilometrong expressway na may apat na linya na mag-uugnay sa Cavite at Laguna.
Patuloy ang konstruksyon sa natitirang 18.5 kilometro ng expressway, partikular sa Subsections 1 at 2. Kabilang sa mga ginagawa ang pangunahing kalsada, tulay, drainage system at mga ramp ng interchange.
Sa kasalukuyan, bukas na sa mga motorista ang CALAX mula Mamplasan sa Biñan City, Laguna hanggang Governors Drive sa General Trias, Cavite.
Kapag natapos ang Subsections 1 at 2, mapapalawig ang expressway mula Open Canal hanggang Kawit, Cavite. Makakonekta rin ito sa Cavite Expressway (CAVITEX) sa pamamagitan ng CAVITEX-CALAX Link (CCLink).
Inaasahang magbibigay ito ng mas direktang ruta mula Cavite at Laguna patungong Metro Manila, bilang alternatibo sa mga pangunahing lokal na kalsada. Mapapadali rin ang biyahe patungo sa mga residential, komersyal at industriyal na lugar sa rehiyon.
Makakatulong ang magkakaugnay na expressway sa mas mabilis na pagbiyahe ng mga tao at produkto, gayundin sa pagpapalakas ng logistics at mga negosyo. Mas mapapadali ang pagdadala ng mga kargamento, hilaw na materyales at mga produktong pangkalakal sa pagitan ng mga pabrika, bodega, distribution hub at pamilihan sa Cavite, Laguna at Metro Manila.
Inaasahan ding mapapabuti ng proyekto ang paggalaw ng mga manggagawa at suplay, mapalakas ang ugnayan ng mga industriyal at komersyal na lugar, at makatulong sa pag-unlad ng ekonomiya sa Cavite at Laguna.
Ang CALAX ay isang Public-Private Partnership (PPP) project sa ilalim ng Department of Public Works and Highways (DPWH), na nagsisilbing ahensiya ng pamahalaang nangangasiwa sa konsesyon. Ang MPCALA Holdings, Inc., isang subsidiary ng Metro Pacific Tollways Corporation, ang pribadong concessionaire ng proyekto. Ellen Apostol
