LANUZA, Surigao del Sur, Philippines – Arestado ang dalawang lalaki at nasamsam ang tinatayang P810,000 halaga ng ilegal na pinutol na de-kalidad na troso sa isang operasyon laban sa illegal logging sa kabundukan ng Lanuza, Surigao del Sur, nitong Miyerkules, Oktubre 7.
Ayon kay Police Regional Office 13 (Caraga) Director Brig. Gen. Rolindo M. Suguilon, isinagawa ang operasyon sa B1 Area, Kilometer 38, Barangay Pakwan, sa pangunguna ng Regional Intelligence Division 13, katuwang ang 1302nd Maneuver Company ng Regional Mobile Force Battalion 13, Lanuza Municipal Police Station at Department of Environment and Natural Resources (DENR) Regional Enforcement Unit.
Kinilala ang mga suspek sa alyas na “Juvie,” 39, residente ng Barangay Caromata, San Miguel, at “Jerome,” 33, mula sa Barangay Maitum, Tandag City.
Nasamsam sa operasyon ang humigit-kumulang 18,000 board feet ng iba’t ibang uri ng de-kalidad na troso, kabilang ang Lauan, Yakal at Tangile. Nakumpiska rin ang isang asul na Rusi cargo tricycle na umano’y ginagamit sa paghakot ng mga troso pababa mula sa kabundukan.
“We will continue to strengthen our operations, together with our partner agencies, against illegal logging and other activities that threaten our forests and natural resources,” pahayag ni Suguilon.
“We will also ensure that those involved in the illegal exploitation of our forests are held accountable under the law,” dagdag niya.
Dinala ang mga nakumpiskang troso sa Community Environment and Natural Resources Office (CENRO) sa Cantilan para sa pangangalaga at opisyal na imbentaryo.
Kasalukuyang nakakulong ang dalawang suspek sa Lanuza Municipal Police Station at nahaharap sa kasong paglabag sa Presidential Decree No. 705 o Revised Forestry Code of the Philippines. RNT/MDS
