MANILA, Philippines — Tinutulan ni acting Transportation Secretary Giovanni Lopez ang panukalang payagan ang mga carpooling vehicles na gumamit ng EDSA Busway
Ito ay dahil aniya na maaari nitong pabagalin ang operasyon ng mga bus at sirain ang layunin ng busway na mabilis na makapaghatid ng mas maraming tao.
Binanggit ni Lopez na idinisenyo ang busway upang makapag-transport ng hanggang 300,000 pasahero araw-araw, hindi mga pribadong sasakyan.
“The busway was designed primarily to move more people—not more cars—by providing fast and uninterrupted service to buses carrying up to 300,000 passengers daily,” ani Lopez.
Ang panukala ay mula kay Metropolitan Manila Development Authority (MMDA) General Manager Nicolas Torre III bilang posibleng solusyon sa trapiko, kabilang ang pagbibigay ng access sa high-occupancy vehicles na may hindi bababa sa 10 pasahero.
Binigyang-diin ni Lopez na dapat manatiling commuter-focused at pro–mass transit ang patakaran sa transportasyon, alinsunod sa utos ni Pangulong Ferdinand Marcos Jr.
Ayon sa kanya, bukas ang Department of Transportation sa dayalogo kasama ang MMDA, ibang ahensya, at civil society upang makabuo ng “more innovative, well-thought of and holistic solutions to traffic problems.” Dave Baluyot
