MANILA, Philippines — Uunahin na ng Department of Social Welfare and Development (DSWD) ang paggamit ng guarantee letters sa halip na cash assistance para sa medical needs matapos mapansing may ilang benepisyaryo na ginagastos ang ayuda sa ibang pangangailangan bukod sa pagpapagamot.
Sa DSWD Media Forum, sinabi ni DSWD Crisis Intervention Program (CIP) Director Edwin Morata na layunin ng pagbabagong ito sa ilalim ng Assistance to Individuals in Crisis Situations (AICS) program na matiyak na magagamit ang ayuda sa tamang layunin at mabawasan ang posibilidad ng panloloko.
Sa ilalim ng guarantee letter system, direktang binabayaran ng DSWD ang mga accredited hospitals, pharmacies, diagnostic centers at iba pang healthcare providers sa halip na ibigay ang tulong sa anyong cash.
“Pwede naman mag-negotiate ng cash to guarantee letter or guarantee letter to cash [pero] mas preferred namin yung una. Pero may mga kliyente na very much open naman kami kasi we still you know value self-determination. At may kliyenteng nag-de-decide na gusto pa rin nila ng cash. Pero ang pakiusap namin pag nag decide kasi sila ng cash, we cannot give the value or amount na nasa guarantee letter,” ani Morata.
Dagdag niya, pinalalawak ng DSWD ang pakikipag-ugnayan sa mga establisimiyentong tumatanggap ng guarantee letters, kabilang ang Mercury Drug at Generika Drugstore, habang nakikipag-usap na rin ito sa Southstar Drug, Rose Pharmacy at Watsons.
Hanggang Mayo 31, nakapagbigay na ang DSWD ng hindi bababa sa P9.22 bilyon na medical at funeral assistance sa 499,978 benepisyaryo sa pamamagitan ng guarantee letters sa ilalim ng AICS program. Santi Celario
