Nangyari ang insidente noong Mayo sa isang cybersecurity evaluation na isinagawa ng Irregular, isang independent company na nagsasagawa ng pagsusuri sa seguridad ng AI systems.

Ayon kay Heather Adkins, Google vice president for security engineering, nakahanap ang Gemini ng pampublikong impormasyon online at nakahula ng credentials upang makapasok sa tatlong website na inakala nitong sakop ng testing.

Sa isang kaso, paulit-ulit na nanghula ang Gemini ng mga password hanggang makapasok sa isang protected system.

Sa dalawang iba pang kaso, nakahanap ito ng credentials sa isang public repository na ginamit nito upang ma-access ang mga protected system, ayon sa Wall Street Journal.

Sinabi ng Google na ipinaalam nito sa tatlong kumpanyang naapektuhan at nakipagtulungan sa training partner nito upang baguhin ang kanilang testing processes.

Sinabi naman ng Irregular na kapareho ito ng isyung naranasan ng iba pang AI labs at naabisuhan na ang mga kumpanyang may kaugnayan dito noong huling bahagi ng Hulyo.

Ibinunyag din ang mga kahalintulad na insidente na may kaugnayan sa Irregular ng Meta, Anthropic at OpenAI. Ayon sa Meta, hindi nito kinasasangkutan ng sandbox escape o sophisticated cyberattack ang insidente nito.

Nagbunsod ang mga insidente ng mga tanong tungkol sa mga safeguard na kailangan habang nagiging mas autonomous ang AI agents at nagkakaroon ng access sa internet at computer systems.

Ayon kay Adkins, sa lahat ng tatlong insidente, huminto ang Gemini sa pagsasagawa ng hacking. RNT/JGC

The post Gemini ng Google, nakapag-hack ng 3 kumpanya sa cybersecurity test first appeared on Remate Online.

SAN FRANCISCO — Nagpatupad ang OpenAI ng bagong sistema para mas regular na maitala, maimbestigahan at maisapubliko ang mga kaso ng hindi inaasahan o problematikong kilos ng artificial intelligence models nito.

Kasabay nito, naglabas ang kumpanya nitong Setyembre 16 ng anim na bagong ulat hinggil sa mga insidenteng nakita nito habang tine-train o sinusuri ang mga modelo sa nakalipas na anim na buwan.

Kabilang sa mga naitalang insidente ang isang unreleased research model na naglagay ng sariling instructions sa task summaries, gayundin ang mga model instance na nagmungkahi ng pagtatago ng pagkakamali o pag-imbento ng nawawalang datos.

Sa isa pang kaso, gumamit umano ang isang modelo ng exposed API key nang walang pahintulot at kalaunan ay nagbigay ng gawa-gawang datos nang hindi nito makuha ang hinihinging impormasyon.

May naitala rin na modelong nag-upload ng file sa internet para lamang magkaroon ng mapagkukunan na maaari nitong i-cite, habang ang ibang AI agents ay gumamit ng internal repository at public file-hosting sites upang makapagpalitan ng impormasyon sa labas ng itinakdang paraan ng kanilang mga gawain.

Nilinaw ng OpenAI na mga indibidwal na insidente ang anim na kaso at hindi dapat ituring na sukatan kung gaano kadalas nangyayari ang ganitong behavior sa lahat ng modelo nito.

Sa ilalim ng bagong framework, maaari nang i-report ang mga insidenteng may kinalaman sa unauthorized actions, pakikipag-ugnayan ng mga modelo sa hindi awtorisadong paraan, pag-iwas sa oversight at iba pang behavior na maaaring maglantad ng kahinaan sa AI safeguards.

Sinabi rin ng kumpanya na hindi kinakailangang may aktuwal nang napinsala bago nito isapubliko ang isang insidente, basta makatutulong ito sa pag-unawa sa AI alignment at kaligtasan.

Ayon sa OpenAI, layunin ng hakbang na mabigyan ang mga researcher, policymaker at publiko ng mas malinaw na ebidensya tungkol sa mga panganib at limitasyon ng mas makapangyarihang AI systems habang patuloy ang mabilis na pag-unlad ng teknolohiya. RNT

The post 6 insidente na pagkilos ng AI lampas sa utos, ibinunyag ng OpenAI first appeared on Remate Online.

Ayon kay CICC Executive Director Renato “Aboy” Paraiso, layunin nitong makahanap ng pinakamainam na sistema para maprotektahan ang mga bata nang hindi kinakailangang ibunyag nila ang kanilang pagkakakilanlan.

“Privacy does not equate to identifiability. In the discussion of child safety, we also have to acknowledge the fact that we must also go after the predators, we must also go after the groomers, and in order for that to happen, we need to identify them,” ani Paraiso.

Inihayag ito ni Paraiso matapos ang isang town hall meeting kung saan nanawagan ang mga stakeholder ng mas mahigpit na hakbang para sa kaligtasan ng mga bata sa social media at gaming platforms.

Dumalo sa pulong ang mga kinatawan ng government agencies, organisasyon at digital safety advocates bilang paghahanda sa pagbuo ngayong buwan ng technical working group (TWG) kasama ang Meta at Roblox.

Layunin ng TWG na bumuo ng mas mahigpit na direktiba laban sa online child grooming, fraud at iba pang mapaminsalang aktibidad ng anonymous users.

Binigyang-diin ng mga kalahok na dapat matukoy ng age assurance kung kabilang ang user sa isang partikular na age group habang nililimitahan ang personal information na kailangang ibahagi.

Sinabi ni Paraiso na pag-aaralan ng TWG ang legalidad, due process, data minimization at technical architecture ng ipinanukalang sistema. RNT/MDS

The post Age verification sa social media, gaming platforms sinusuri ng CICC first appeared on Remate Online.

Gagamitin ng mga researcher ng Federal Institute of Technology Zurich (ETH) ang humigit-kumulang 100 petabytes ng publicly available NASA climate data na inilagay sa mga server na konektado sa supercomputer na Alps.

Ayon kay Thomas Schulthess, computational physics professor ng ETH at pinuno ng Swiss National Supercomputing Centre, malaking oportunidad ito para sa mga siyentipiko dahil direktang magagamit ang napakalaking NASA dataset sa supercomputer.

Humigit-kumulang isang taon ang ginugol sa pagkopya ng nasa 6 bilyong NASA files. Ayon kay climate physics professor Reto Knutti, mahalaga ang napakaraming datos sa pagbuo ng AI models na makapagpapabilis sa weather at climate forecasting.

Mas mabilis umano ang AI-generated statistical models kaysa sa tradisyunal na paraan na gumagamit ng mathematical equations upang gayahin ang kumplikadong proseso sa atmosphere at karagatan.

Ayon kay Knutti, maaaring makagawa ang isang statistical model ng global weather forecast para sa ilang araw sa loob lamang ng halos isang minuto. Dahil mabilis itong patakbuhin, maaari ring magsagawa ng mas maraming forecast kada ilang minuto upang makita ang mga partikular na weather pattern.

Maaari itong gamitin sa early warning systems upang makatulong na makapagligtas ng buhay. Posible rin umanong matukoy nang mas maaga ang mga panganib gaya ng landslide at glacier collapse sa pamamagitan ng pagsusuri sa satellite data.

Binigyang halimbawa ni Knutti ang glacier collapse sa Swiss village ng Blatten noong Mayo 2025, na nakita na umano sa satellite data mahigit isang taon bago nangyari. Dahil sa monitoring, nailikas ang mga residente isang linggo bago ang pagbagsak ng glacier at naiwasan ang malawakang pagkamatay.

Maaari rin umanong makatulong ang masusing pagsusuri ng satellite data sa pagtukoy ng mga lugar na posibleng makaranas ng katulad na sakuna, gaya ng glacier collapse sa Nepal-China border noong Agosto 26. RNT/MDS

The post Weather, climate forecasting gamit AI, pinag-aaralan first appeared on Remate Online.

Sa serye ng kanyang posts sa X, sinabi ni Coxon na tatlong taon siyang nagsagawa ng pretraining research sa OpenAI at Anthropic at kapwa umano hindi sapat ang kanilang pagtutok sa kaligtasan ng AI.

Aniya, patungo ang mga kumpanya sa pagbuo ng self-improving superintelligence na maaaring lumampas sa kakayahan ng tao.

“Do not underestimate the power of this technology. These will soon be superhuman systems that can hack anything, revolutionize any field overnight, and acquire real power and resources,” aniya.

Dagdag pa niya, “The people building AI earnestly believe that it could kill us all by the end of the decade.”

Nanawagan si Coxon ng mas mahigpit na pag-iingat at pagkilos upang matugunan ang mga panganib bago maging huli ang lahat. RNT/MDS

The post Banta ng AI sa sangkatauhan, ibinabala first appeared on Remate Online.

Ayon kay DICT Secretary Henry Aguda, mapipilitan ang lahat ng social media platform, kabilang ang Meta, na sumunod sa sandaling maisabatas ang panukala.

“In 2-months time, baka pumasa na sa Senado yung final social media bill na sabi naman ni Meta…walang pag-aatubili yun na magko-comply sila ‘pag lumabas na yung batas so no choice si Meta to comply with the law,” ani Aguda.

Nauna nang inaprubahan ng isang House panel ang kahalintulad na panukala.

Kasunod ito ng puna ng Cybercrime Investigation and Security Council (CICC) sa mabagal na pagtanggal ng ilang social media platform sa violent content na may kaugnayan sa mga insidente ng pamamaril sa paaralan sa Pilipinas.

Nakipagpulong din kamakailan ang DICT, CICC at iba pang ahensya ng gobyerno sa mga kinatawan ng Meta sa Singapore upang talakayin ang mga hakbang laban sa child violence na iniuugnay sa marahas na online games. RNT/MDS

The post Mahigpit na social media regulation, posibleng maging batas sa mga susunod na buwan – DICT first appeared on Remate Online.

Isa ito sa limang hinihingi ng gobyerno sa online gaming platform, kabilang ang pagtatayo ng opisina sa Pilipinas.

“Yung fifth nalang na kulang is ‘yung age verification through the national ID. So by October, dapat kumpleto na po si Roblox,” ani Aguda.

Ayon kay Aguda, ang Roblox ang nagmungkahi na gamitin ang national ID para masigurong tama ang edad ng mga gumagamit. Hindi umano ililipat ang personal na impormasyon mula PSA patungo sa Roblox; ibe-verify lamang ang pagkakakilanlan.

Interesado rin ang Meta na gamitin ang parehong sistema kung magiging matagumpay ito sa Roblox upang matiyak na angkop sa edad ang content na nakikita ng mga kabataan.

Gayunman, sinabi ni Aguda na nangangamba ang Meta na kung ipatutupad ito sa Pilipinas, maaari rin itong hilingin ng iba pang bansa. Magpapadala ang Meta ng technical working team sa Pilipinas para pag-aralan ang sistema.

Samantala, sinabi ni Aguda na nakapag-hire na ang Roblox ng 300 empleyado sa pamamagitan ng partner nito para sa planong opisina sa bansa. Inaasahan namang maitatayo ng Meta ang Philippine office bago matapos ang taon.

Ang mga hakbang ay kasunod ng mga pangamba sa posibleng papel ng Roblox sa radicalization ng mga bata matapos ang pamamaril sa Ateneo de Zamboanga.

Ang panukalang 2027 budget ng DICT at mga attached agency nito ay P19.4 bilyon. RNT/MDS

The post Age verification sa Roblox, ipatutupad sa Oktubre first appeared on Remate Online.

Sinimulan noong Agosto 26 ang full operations ng J-HRTI Kanto Data Factory sa Narashino, Chiba Prefecture, silangan ng Tokyo. Pinatatakbo ito ng Japan Humanoid Robot Training & Implementation (J-HRTI), isang consortium ng mga pribadong kumpanya kabilang ang Tsumura & Co. at Yamazen Corp.

May lawak na humigit-kumulang 1,400 square meters ang pasilidad at nagsimula ito sa 35 humanoid robots, na maaaring palawakin hanggang 40 units.

Sa loob ng pasilidad, kinokontrol ng mga operator ang humanoid robots upang makalikom ng datos mula sa iba’t ibang galaw at gawain. Ang nakalap na impormasyon ay inaayos at ginagawang training data na maaaring gamitin ng physical artificial intelligence o physical AI upang matutunan ng robots ang mga gawain sa aktuwal na workplace.

May hiwalay ding test area na ginagaya ang tunay na workplace environment upang paulit-ulit na subukan at i-adjust ang kilos ng mga robot bago sila gamitin sa mga pabrika at iba pang operasyon.

Sa halip na bawat kumpanya ang magkahiwalay na gumastos sa equipment, manpower at libu-libong training runs, pagsasaluhan ng mga miyembro ng consortium ang imprastraktura at learning data na nalilikha sa pasilidad.

Target ng J-HRTI na makapagsimulang mag-deploy ng humanoid robots sa mga aktuwal na industrial workplace sa loob ng fiscal year 2026, kabilang sa mga posibleng unang gawain ang simpleng pagdadala ng mga materyales.

Itinatag ang consortium noong Marso 26, 2026 bilang tugon din sa lumalalang kakulangan ng manggagawa sa Japan bunsod ng tumatandang populasyon at pagbaba ng labor force.

Plano rin ng J-HRTI na palawakin ang network nito sa hanggang 10 training at data facilities sa iba’t ibang bahagi ng Japan upang mapabilis ang paggamit ng physical AI at humanoid robots sa industriya.

The post School para sa humanoid robots, binuksan sa Japan: Tuturuan ng gawaing-pantao first appeared on Remate Online.

MANILA, Philippines — Itinuturing lamang na huling opsyon ng Cybercrime Investigation and Coordinating Center (CICC) ang pag-block sa Facebook at iba pang online platforms sa Pilipinas habang naghahanap ang gobyerno ng ibang paraan upang mapalakas ang online safety.

“Let’s be clear, ‘yung geoblocking ng platforms is only the last option for us,” sinabi ni CICC Executive Director Renato “Aboy” Paraiso sa isang panayam nitong Miyerkules, Agosto 26.

Ayon kay Paraiso, uunahin ng pamahalaan ang pakikipagdayalogo sa Meta, parent company ng Facebook, at online gaming platform na Roblox hinggil sa mga hakbang na maaari nilang gawin laban sa harmful content at karahasang maaaring makaapekto sa mga gumagamit, partikular sa mga kabataan.

Nais din umano ng gobyerno na malaman kung bakit hindi maipatupad sa Pilipinas ang ilang online safety measures na ginagamit ng naturang mga kumpanya sa ibang bansa.

“Ito ‘yung commitment natin, uunahin natin na magkaroon ng ibang hakbang bago ikonsidera ang pag-block sa mga platforms na ito,” ani Paraiso.

Nakatakda ring makipagpulong ang mga opisyal ng pamahalaan sa regional executives ng Meta at Roblox sa Singapore upang talakayin ang online child safety at iba pang safeguards sa kanilang mga platform.

Nauna nang sinabi ng Malacañang na bukas si Pangulong Ferdinand Marcos Jr. sa pag-aaral ng mas mahigpit na restrictions sa mga digital platform kung mapatutunayang nakapipinsala ang mga ito sa publiko, partikular sa mga kabataan.

Gayunman, sinabi ni Palace Press Officer Claire Castro na kailangan munang pag-aralan nang mabuti ang epekto ng naturang hakbang at kung sapat ang tugon at accountability ng mga social media platform.

Muling umigting ang usapin sa online safety kasunod ng mga insidente ng karahasan sa mga paaralan at mga alegasyon hinggil sa exposure ng ilang kabataan sa violent online content. Dave Medina

The post Facebook ban sa Pinas, ‘last resort’ vs violence — CICC first appeared on Remate Online.