TECH TREND - Remate Online

Gorebox kinalos na sa Google, Steam sa Pinas

denn — Wed, 01 Jul 2026 03:20:57 +0000

MANILA, Philippines – Inanunsyo ng Cybercrime Investigation and Coordinating Center (CICC) nitong Martes na tinanggal na ang mobile at PC game na Gorebox sa Google Play Store at Steam sa Pilipinas bilang pagsunod sa pansamantalang pagbabawal na ipinatupad ng pamahalaan noong nakaraang linggo.

Ayon sa CICC, pinagbigyan ng Google ang kahilingan ng gobyerno ng Pilipinas na harangin ang access sa laro sa buong bansa, kabilang ang online gaming component nito.

Dahil sa restriksyon, hindi na mada-download ang laro sa Pilipinas at hindi na rin magagamit nang maayos ang mga naunang na-install na kopya dahil hanggang loading screen na lamang ito.

Malugod namang tinanggap ni Department of Information and Communications Technology (DICT) Secretary Henry Aguda ang naging hakbang ng Google at Steam, na aniya ay makatutulong sa pagsusulong ng mas ligtas na online environment para sa mga bata.

“With this restriction, we are assured that minors will no longer be able to access such a violent game,” ani Aguda.

Ipinatupad ang restriksyon matapos ang pagpupulong noong Lunes ng DICT, CICC, at mga kinatawan ng Google Philippines at Google LLC, kung saan muling hiniling ng pamahalaan ang nationwide blocking ng laro hanggang matiyak na hindi na ito madaling maa-access ng mga menor de edad. Sumunod din ang Steam sa ipinatupad na pansamantalang restriksyon.

Nagpatupad ng temporary ban ang pamahalaan noong nakaraang linggo matapos lumabas sa imbestigasyon ng pulisya sa naganap na pamamaril sa San Jose National High School sa Tacloban City na isa sa dalawang teenage suspects ay isang masugid na manlalaro ng Gorebox. Dave Baluyot

The post Gorebox kinalos na sa Google, Steam sa Pinas first appeared on Remate Online.

AI Para sa Kabataang Pilipino: Hindi Ito Pang-Kopya, Pang-Likha Ito

denn — Tue, 30 Jun 2026 07:33:25 +0000

By The VoiceMaster | Balitang AI

Ang Artificial Intelligence o AI ay hindi na science fiction. Hindi na ito pang-Silicon Valley lang. Hindi na ito pang-mayaman, pang-techie, o pang-English speaking lang.

Nandito na ito sa classroom, cellphone, homework, research, content creation, business ideas, voice technology, video production, translation, coding, tutoring, at kahit sa pang-araw-araw na desisyon ng kabataang Pilipino.

Pero eto ang tanong:
Ginagamit ba ng kabataang Pilipino ang AI para matuto, o ginagamit lang para makalusot?

Diyan dapat magsimula ang totoong usapan.

Ngayong 2026, mas malinaw na ang direksyon ng Pilipinas: kailangan nang turuan ang kabataan hindi lang kung paano gumamit ng AI, kundi kung paano gumamit nito nang tama, ligtas, responsable, at may sariling pag-iisip.

Sa basic education, inilunsad ang Project AGAP.AI, isang pambansang programa para palawakin ang AI literacy ng mga estudyante, guro, at magulang. Layunin nitong gawing “kaagapay” ang AI sa pagkatuto, hindi kapalit ng utak, sipag, at disiplina.

Maganda ang direksyon. Pero hindi sapat ang programa kung walang malinaw na kultura ng paggamit.

Kasi aminin natin, maraming estudyante ngayon ang gumagamit ng AI para gumawa ng essay, sagot, reflection paper, presentation, caption, script, at research output. Ang problema, kapag basta kopya lang, hindi na learning ang nangyayari. Nagiging instant output. Walang proseso. Walang struggle. Walang sariling boses.

At kapag nawala ang proseso, nawawala rin ang talino.

Hindi masama ang AI. Ang masama ay tamad na paggamit ng AI.

Ang AI ay puwedeng maging tutor. Puwede itong magpaliwanag ng math problem, magbigay ng writing structure, mag-translate ng mahirap na konsepto, tumulong sa pagbuo ng project ideas, mag-summarize ng readings, at magbigay ng feedback sa grammar at clarity.

Pero hindi ito dapat maging ghostwriter ng pagkatao mo.

Ang tunay na AI-literate na kabataan ay marunong magtanong, mag-check ng sources, magkumpara ng impormasyon, mag-duda kapag may mali, at umamin kung gumamit ng AI. Hindi siya basta nagpapauto sa unang sagot ng chatbot. Hindi siya basta copy-paste warrior. Hindi siya dependent. Siya ang boss. Tool lang ang AI.

Ito ang dapat matutunan ng bawat batang Pilipino:

Una, gamitin ang AI para mas maintindihan ang lesson, hindi para takasan ang lesson.

Ikalawa, huwag ilagay ang personal data, school records, private photos, passwords, addresses, o sensitibong impormasyon sa kahit anong AI tool.

Ikatlo, i-fact-check ang sagot ng AI. Minsan confident ang AI kahit mali. Parang tao rin minsan, ang lakas ng dating pero sablay pala.

Ikaapat, gamitin ang AI para gumawa ng sariling ideya, hindi para patayin ang sariling creativity.

Ikalima, huwag hayaang mawala ang Filipino identity. Kung gagamit tayo ng AI, dapat may sariling wika, kultura, boses, at karanasan ang Pilipino sa loob ng teknolohiya.

Dito mahalaga ang Filipino youth.

Ang kabataan ang magiging unang henerasyon ng mga AI-native Filipino. Sila ang gagawa ng bagong negosyo, bagong content, bagong apps, bagong advocacy, bagong paraan ng pagkatuto, at bagong uri ng trabaho.

Pero kung hindi sila gagabayan, puwede rin silang maging unang henerasyon ng AI-dependent Filipinos.

Malaking pagkakaiba iyon.

AI-native means marunong kang gumamit ng AI para lumakas ang utak mo.
AI-dependent means hindi ka na gumagana kapag wala ang AI.

Kaya ang hamon ngayon sa DepEd, CHED, DICT, DOST, TESDA, schools, parents, creators, and community leaders ay malinaw: huwag lang bigyan ng access ang kabataan. Bigyan sila ng ethics, digital discipline, critical thinking, media literacy, privacy awareness, at creative confidence.

Hindi sapat na marunong mag-prompt. Dapat marunong mag-isip.

Hindi sapat na mabilis gumawa ng output. Dapat may saysay ang output.

Hindi sapat na “AI-ready” ang estudyante. Dapat “future-ready” ang pagkatao.

Para sa kabataang Pilipino, ang AI ay hindi dapat maging shortcut sa pangarap. Dapat itong maging tulay papunta sa mas malalim na pagkatuto, mas malikhaing trabaho, at mas makabuluhang serbisyo sa bayan.

Dahil sa huli, hindi AI ang magliligtas sa Pilipinas.

Ang magliligtas sa Pilipinas ay kabataang marunong gumamit ng AI nang may utak, puso, dangal, at malasakit.

Ito ang Balitang AI.

Basta Boses AI, CreatiVoices AI.

#BalitangAI #AITalks #AIEducationPH #FilipinoYouth #AIForGood #ResponsibleAI #DigitalLiteracy #KabataangPilipino #VoiceMaster #CreatiVoices

The post AI Para sa Kabataang Pilipino: Hindi Ito Pang-Kopya, Pang-Likha Ito first appeared on Remate Online.

BatStateU students, pumangatlo sa international space robotics competition

denn — Fri, 26 Jun 2026 06:50:21 +0000

MANILA, Philippines – Pumangatlo ang isang grupo ng aerospace engineering students mula sa Batangas State University (BatStateU) sa international Kibo Robot Programming Challenge (Kibo-RPC), ayon sa Philippine Space Agency (PhilSA).

Ang koponang Inflection Point ay nagprograma sa Astrobee robot ng NASA na nasa Japanese Kibo module ng International Space Station (ISS), kung saan nakipagkumpitensya sila sa 738 koponan mula sa mahigit 30 bansa sa image recognition accuracy at mission speed.

Binubuo ang grupo nina third-year students Howell Dela Cruz, John Royeth Samson, Ahron Martinez, Benedict Lontok, Andrew Cabile, at Amer Panganiban. Natapos nila ang apat sa limang mission tasks sa live test run at nakakuha ng 216.8 sa kabuuang 300 puntos.

Ayon sa PhilSA, kasunod ito ng kanilang makasaysayang pagtatapos sa ikalawang puwesto noong 2024, kung saan sila ang kauna-unahang koponan mula sa Pilipinas na lumahok at nanalo sa Kibo-RPC.

Idinaos ang final round ng kompetisyon sakay ng ISS noong Pebrero 28. Layunin ng Kibo-RPC na sanayin ang mga estudyante sa Asia-Pacific sa pagprograma ng mga robot para sa operasyon sa kalawakan sa ilalim ng microgravity conditions. RNT

The post BatStateU students, pumangatlo sa international space robotics competition first appeared on Remate Online.

Tacloban shooting probe ni Risa, tinabla ng Gorebox developer; German embassy kakalampagin

denn — Fri, 26 Jun 2026 05:22:23 +0000

MANILA, Philippines – Kakalampagin ni Senador Risa Hontiveros ang German embassy sa Pilipinas matapos tumanggi ang Gorebox developer na dumalo sa pagdinig sa Hulyo1 hinggil sa Tacloban shooting na ikinamatay ng apat na estudyante at 15 sugatan.

Sa pahayag, sinabi ni Hontiveros, chairman ng Senate committee on women, youth, family relations and gender equality na kailangan matanong ang Gorebox, ang video game na iniuugnay ng awtoridad sa naganap na pamamaril.

“The Germany-based developer of Gorebox, the video game linked by authorities to the Tacloban school shooting investigation, has declined to attend the July 1 hearing of the Senate Committee on Women, Children, Family Relations, and Gender Equality,” ayon kay Hontiveros.

Aniya, hihilingin ng Senado ang tulong ng German embassy upang maisagawa ang partisipashyon ng developer na si Felix Filip sa gagawing imbestigasyon.

“Nakakadismaya na pinili ni Mr. Filip na huwag dumalo sa darating na hearing namin lalo na’t marami sana akong gustong malaman mula sa kanya mismo,” ani Hontiveros.

“My committee remains open to facilitate his attendance and participation in our investigation in case he changes his mind. Hindi dito nagtatapos ang aming pagnanais na marinig siya,” dagdag ng senadora.

Base sa tugon ni Filip, ayon kay Hontiveros, na nagpakilala bilang isang Germany-based independent game developer, na nagsabi sa Committee Secretariat sa pamamagitan ng email “that he would not attend the hearing, either in person or through Zoom.”

Umaasa sana si Hontiveros na direktang matanong si Filip hinggil sa guardrails ng Gorebox partikular sa “age safeguards, content moderation, and possible exposure of young users to harmful online communities or behavior.”

The senator also emphasized the issue goes beyond one developer or one game, but about setting a clear standard.

Nagbabala si Hontiveros sa foreign-based developers at online platforms na hindi sila malayang makapag-operate sa Pilipnas kapag tumatakas sa pananagutan sa seryosong kaligtasan ng kabataan.

“Any developer or online company that wants to operate here, profit from Filipino users, and reach Filipino children must respect our laws and our institutions. This should be the bare minimum for them to do business here. Kung ayaw nilang kilalanin, mananagot rin sila,” ani Hontiveros.

Sa Hulyo 1, umaasa ang Senado na masusuri ang mas malawak na pagkakamali na nakatulong sa Tacloban shooting kabilang ang posibleng “grooming, radicalization, and normalization of violence in online platforms.”

“Hindi natin sinasabing isang laro lang ang dahilan ng trahedyang ito. Pero kung may online environment na maaaring naging bahagi ng pagkakalantad ng mga bata sa karahasan, tungkulin nating siyasatin iyon,” ani Hontiveros. Ernie Reyes

The post Tacloban shooting probe ni Risa, tinabla ng Gorebox developer; German embassy kakalampagin first appeared on Remate Online.

Bezos: AI magdudulot ng kakulangan sa manggagawa, ‘di kawalan ng trabaho

denn — Tue, 23 Jun 2026 04:34:46 +0000

ISTANBUL – Naniniwala si bilyonaryong negosyante at founder ng Amazon na si Jeff Bezos na magdudulot ang artificial intelligence (AI) ng kakulangan sa manggagawa sa halip na malawakang pagkawala ng trabaho.

Sa kanyang talumpati sa VivaTech technology fair sa Paris, tinutulan ni Bezos ang pananaw na papalitan ng AI ang malaking bilang ng mga manggagawa.

“I absolutely do not agree with that. I think artificial intelligence will create labor shortages because it will allow people to identify more problems,” aniya.

Ayon kay Bezos, hindi kakulangan sa imahinasyon ang humahadlang sa inobasyon kundi ang kakayahang maisakatuparan ang mga ideya. Marami umanong konsepto ang hindi natutupad dahil mahirap itong ipatupad, ngunit maaaring mapabilis ng AI ang prosesong ito.

“It is not our imagination that limits us, but what we are able to do,” dagdag niya.

Sinabi rin ni Bezos na makatutulong ang AI upang mas maraming ideya ang maisakatuparan at mapabilis ang pagbuo ng mga bagong imbensyon.

Dumating ang kanyang pahayag habang patuloy na nagpapalawak ng pamumuhunan sa AI ang Amazon. Mula noong huling bahagi ng nakaraang taon, tinatayang nasa 30,000 trabaho na ang nabawas sa kumpanya habang pinalalakas nito ang kakayahan sa artificial intelligence.

Tinalakay rin ni Bezos ang usapin ng space exploration at iginiit na ang pinakamalaking hamon sa hinaharap ay hindi kakulangan sa demand kundi limitadong access sa kalawakan.

“We will go to the moon not only to visit, but to stay,” aniya. RNT

The post Bezos: AI magdudulot ng kakulangan sa manggagawa, ‘di kawalan ng trabaho first appeared on Remate Online.

500 ahensya sa Mindanao, ikinonekta ng DICT sa fiber network

Mia — Sat, 20 Jun 2026 05:17:07 +0000

MANILA, Philippines – Tinatayang 5.3 milyong Pilipino ang makikinabang sa pinahusay na serbisyo ng pamahalaan matapos ikonekta ang humigit-kumulang 500 government agencies at facilities sa Mindanao sa ilalim ng unang yugto ng Mindanao Integrated Government Network (MIGN), ayon sa Department of Information and Communications Technology (DICT) noong Hunyo 19.

Ang proyekto, na bahagi ng National Fiber Backbone Project, ay layuning tugunan ang matagal nang problema sa konektibidad sa mga liblib at madalas tamaan ng sakuna na lugar.

Ayon sa DICT, konektado na ang mga government facilities sa Cagayan de Oro, Butuan, Davao City, Koronadal, at Pagadian, bilang bahagi ng lumalawak na National Fiber Backbone na nag-uugnay sa mga ahensya ng gobyerno sa iba’t ibang rehiyon.

Kabilang sa mga konektadong ahensya ang DepEd, TESDA, DOLE, DPWH, DENR, at Office of Civil Defense (OCD).

Ayon sa DICT, magreresulta ito sa mas mabilis na access sa edukasyon, trabaho, at iba pang serbisyo ng gobyerno, pati na rin sa mas mahusay na koordinasyon sa pagitan ng mga ahensya sa pamamagitan ng real-time data sharing.

Dagdag pa ng ahensya, palalakasin din nito ang disaster preparedness at emergency response sa pamamagitan ng mas mabilis na palitan ng impormasyon sa panahon ng sakuna tulad ng lindol, bagyo, at baha.

“Connectivity is not just convenience, it is a lifeline. It is coordination, safety, and faster response when every second matters. This is the real promise: not just better technology, but better service. Not just faster internet, but faster response to people’s needs,” ayon kay DICT Secretary Henry Aguda.

Ayon pa sa DICT, ang proyekto ay mahalagang hakbang sa pagkonekta ng mga ahensya sa Luzon, Visayas, at Mindanao sa isang unified digital infrastructure, na inaasahang magpapahusay din sa internet access at posibleng magpababa ng gastos sa serbisyo. RNT/MND

The post 500 ahensya sa Mindanao, ikinonekta ng DICT sa fiber network first appeared on Remate Online.

Freedom of expression, lumiit dahil sa AI, digital giants – eksperto

Mia — Thu, 18 Jun 2026 09:04:31 +0000

MANILA, Philippines – Nagbabala ang United Nations special rapporteur on freedom of opinion and expression na si Irene Khan na mabilis na lumiliit ang espasyo para sa kalayaan sa pagpapahayag sa maraming bansa dahil sa papel ng mga gobyerno, malalaking kumpanya ng teknolohiya, at artificial intelligence.

Sa kanyang huling ulat sa United Nations Human Rights Council sa Geneva, sinabi ni Khan na ang kalayaan sa opinyon at pamamahayag ay “privatized, monetized, manipulated, and unlawfully restricted.”

Ayon sa kanya, nagiging dahilan din ng paghina ng kalayaang ito ang pag-uugnay ng interes ng estado at malalaking korporasyon, kung saan ginagamit ang kapangyarihang politikal at ekonomiko upang maimpluwensyahan ang regulasyon ng AI at digital platforms.

Binatikos din niya ang sobrang kapangyarihan ng malalaking tech companies, na aniya ay may impluwensyang higit pa sa maraming gobyerno at walang sapat na pananagutan sa publiko.

“AI is running amok,” babala niya, at iginiit na ang mabilis na pag-unlad ng teknolohiya na walang malinaw na regulasyon ay nagdudulot ng panganib sa lipunan, kabilang ang pagkalat ng hate speech, maling impormasyon, at online violence.

Dagdag pa niya, naaapektuhan din ang mga mamamahayag, kababaihan, at kabataan dahil sa online abuse at pagkasira ng kalidad ng impormasyon sa internet.

Binatikos din niya ang paggamit ng ilang bansa ng mga batas kontra-terorismo at iba pang kriminal na batas upang supilin ang dissent at mapayapang protesta. RNT/MND

The post Freedom of expression, lumiit dahil sa AI, digital giants – eksperto first appeared on Remate Online.

Meta Philippines: Walang data na nawala sa kamakailang global outage

Mia — Thu, 18 Jun 2026 08:42:53 +0000

MANILA, Philippines – Nilinaw ng Meta Platforms Philippines na walang data na na-compromise sa naging outage ng kanilang mga aplikasyon noong nakaraang linggo.

Ayon kay Meta Philippines head of public policy Gio Tingson, agad na naibalik ang serbisyo ng Facebook, Messenger, at Instagram at walang naitalang pagkawala ng data o problema sa seguridad ng mga user accounts.

“Ang maganda dito ay hindi po siya matagal. Yung disruption po na nangyari ay klaro naman na na-restore natin lahat ng services. At walang nawalang data or anything monetary, or anything in relation to the safety and the use of the accounts of our Facebook users,” ani Tingson.

Dagdag niya, patuloy pa rin ang imbestigasyon ng kumpanya sa sanhi ng outage at kasalukuyan pang tinatapos ang audit.

Nangyari ang aberya noong gabi ng Hunyo 12, kung saan libo-libong users sa buong mundo ang naka-experience ng problema sa pag-access ng Facebook, Messenger, at Instagram, at pansamantalang na-log out sa kanilang accounts.

Ayon sa monitoring site DownDetector, mahigit 100,000 reports ang naitala para sa Facebook at humigit-kumulang 10,000 para sa Instagram bago maibalik ang serbisyo matapos ang ilang oras. RNT/MND

The post Meta Philippines: Walang data na nawala sa kamakailang global outage first appeared on Remate Online.

Social media user identity sa Pinas, umabot sa 95.8M — ulat

denn — Thu, 18 Jun 2026 01:06:35 +0000

MANILA, Philippines — Umabot sa 95.8 milyong social media user identities sa Pilipinas noong Oktubre 2025 matapos madagdagan ng 9 milyon sa loob lamang ng isang taon, ayon sa Digital 2026 Philippines report ng DataReportal.

Batay sa ulat na inilahad ng Meltwater nitong Miyerkules, tumaas ng 10.3 porsiyento ang bilang ng social media user identities kumpara sa nakaraang taon, ang pinakamabilis na paglago sa mga pangunahing digital indicators ng bansa. Katumbas ito ng 81.9 porsiyento ng tinatayang 117 milyong populasyon ng Pilipinas.

Mas mabilis ang paglago ng social media user identities kumpara sa bilang ng internet users at mobile connections. Umakyat sa 98 milyon ang internet users o pagtaas na 789,000 katao o 0.8 porsiyento, habang lumobo sa 137 milyon ang cellular mobile connections matapos madagdagan ng 4 milyon o 3 porsiyento.

Ayon sa ulat, nananatiling mahalagang bahagi ng araw-araw na buhay ng mga Pilipino ang social media bilang plataporma para sa komunikasyon, libangan, negosyo, pagkuha ng balita, at pakikilahok sa komunidad.

Gayunman, nilinaw ng DataReportal na ang social media user identities ay hindi nangangahulugang katumbas ng bilang ng indibidwal na gumagamit ng social media dahil maraming gumagamit ng higit sa isang account, habang ang ilan ay pag-aari ng mga negosyo, organisasyon, brand, at iba pang non-human entities.

Ipinakita rin ng ulat na mas mataas pa rin sa pandaigdigang average ang internet adoption sa Pilipinas, kung saan 83.8 porsiyento ng mga Pilipino ang online kumpara sa global average na 73.2 porsiyento.

Samantala, umabot sa 137 milyong cellular mobile connections ang naitala sa bansa, katumbas ng 117 porsiyento ng kabuuang populasyon, na nagpapakitang marami ang may higit sa isang mobile subscription o SIM card.

Tinatayang nasa 117 milyon ang populasyon ng Pilipinas noong Oktubre 2025, kung saan 49.1 porsiyento ang naninirahan sa urban areas. Lumago rin ang populasyon ng humigit-kumulang 942,000 katao o 0.8 porsiyento sa nakalipas na taon.

Pinagsama-sama ng DataReportal ang datos mula sa mga ahensya ng gobyerno, telecommunications companies, internet platforms, research organizations, at analytics firms. Dave Baluyot

The post Social media user identity sa Pinas, umabot sa 95.8M — ulat first appeared on Remate Online.