MANILA, Philippines – Target ng Commission on Elections na makapagtala ng hindi bababa sa 70 hanggang 75 porsiyentong voter turnout sa kauna-unahang Bangsamoro Autonomous Region in Muslim Mindanao Parliamentary Elections sa Setyembre 14.
Sinabi ni Comelec Chairman George Erwin Garcia na umaasa ang poll body na lalahok ang malaking bahagi ng 2,393,202 rehistradong botante sa rehiyon sa makasaysayang halalan.
“We hope we can increase not only the awareness but also the voter turnout among our fellow citizens. I hope we can reach at least 70 percent to 75 percent, or even higher,” ani Garcia sa isang telephone interview.
“If we only manage a 20 percent voter turnout here in the Bangsamoro elections, it would seem as though we didn’t do anything about it,” dagdag niya.
Pinakamaraming rehistradong botante ang Lanao del Sur na may 727,546, kasunod ang Maguindanao del Sur na may 469,114 at Maguindanao del Norte na may 419,365.
May 264,188 botante naman ang Tawi-Tawi, 248,245 ang Basilan, 133,673 ang Special Geographic Area at 131,071 ang Cotabato City.
Magtatatag ang Comelec ng 5,212 clustered precincts sa 1,186 voting centers na saklaw ang 2,185 barangay sa BARMM sa araw ng halalan.
Pipili ang mga botante ng isang Regional Parliamentary Political Party at isang Parliamentary District Representative sa kani-kanilang lugar.
Boboto rin sila ng anim na nominado mula sa Parliamentary Sectoral Organizations—dalawa para sa Settler Communities at tig-isa para sa Women, Youth, Traditional Leaders at Ulama. RNT
