Home NATIONWIDE DA chief: Wala pang rekomendasyon sa food security emergency

DA chief: Wala pang rekomendasyon sa food security emergency

MANILA, Philippines – Sinabi ni Department of Agriculture Secretary Francisco Tiu Laurel nitong Biyernes, Enero 24 na hindi pa nito natatanggap ang opisyal na rekomendasyon sa pagdedeklara ng food security emergency.

”Well, the NPCC (National Price Coordinating Council) has finalized the draft noong Tuesday pa lang, and the document is now umiikot for signature. So, na-delay nga. I was expecting it this week. So, malamang next week, makukuha ko na iyong signed document on the official recommendation for the declaration of rice emergency,” ani Tiu Laurel sa isang press briefing.

Sa ilalim ng Republic Act 12078, o batas na nag-aamyenda sa Agricultural Tariffication Act, ang Agriculture chief ay may kapangyarihan na magdeklara ng food security emergency sa bigas dahil sa shortage ng suplay nito o napakataas na presyo.

Kamakailan ay inaprubahan ng National Price Coordinating Council ang resolusyon na humihimok sa DA na magdeklara ng “food security emergency for rice” dahil sa nananatiling mataas na presyo nito.

Sa oras na maaprubahan, ang pamahalaan ay magbebenta ng 300,000 tonelada ng bigas pagsapit ng Pebrero. RNT/JGC