UMABOT na sa Php 31.93 billion ang pondong nailabas ng Department of Budget and Management (DBM) para sa first tranche ng salary adjustment ng mga manggagawa sa pamahalaan para sa mga buwan ng Enero 2024 hanggang Agosto 2024.
Sakop nang inilabas na pondo ang mga manggagawa mula sa 257 na kagawaran at mga ahensya ng pamahalaan. Kasalukuyan pang pinoproseso ng kagawaran ang para sa 58 pang mga tanggapan.
Pagsunod ito ng DBM sa direktiba ni President Ferdinand “BBM” Marcos, Jr. sa inilabas nitong Executive Order No. 64 nitong August 2, 2024 para sa pagtataas ng suweldo ng mga empleyado sa ehekutibo, lehislatura, hudikatura, mga komisyong konstitusyonal, government-owned-and-controlled corporation, at lokal na pamahalaan.
Sabi ni DBM Secretary Amenah Pangandaman, minamadali nila ang paglalabas ng pondo kaugnay sa salary adjustment dahil alam nilang pinakahihintay at kinakailangan ito ng mga manggagawa.
Inaasahan niya umano na mabilis din itong maipamamahagi sa mga manggagawa sa pamahalaan. Ang pagtataas ng suweldo na matatanggap ng mga manggagawa hanggang 2027 ay isa sa mga sentro ng State of the Nation Address (SONA) ni Pangulong BBM nitong July 2024.
Sa monitoring ng DBM, ang mga kagawaran, ahensya at tanggapan na nakatanggap na ng Special Allotment Release Order (SARO) ay ang:
– Congress of the Philippines
– Office of the President
– Office of the Vice President
– Department of Agriculture
– Department of Education
– Department of Energy
– Department of Foreign Affairs
– Department of Health
– Department of Justice
– Department of Migrant Workers
– Department of National Defense
– Department of Trade and Industry
– Civil Service Commission
– Commission on Audit
– Commission on Human Rights
– State Universities and Colleges
– Department of Environment and Natural Resources
– Department of Information and Technology
– Department of Interior and Local Government
– Department of Labor and Employment
– Department of Public Works and Highways
– Department of Science and Technology
– Department of Social Welfare and Development
– National Economic Development Authority
– Metropolitan Manila Development Authority
– Department of Budget and Management
– Other Executive Offices (OEOs)
Paliwanag ng DBM, ang paglalabas ng pondo ay nakadepende sa isinumiteng kahilingan ng mga tanggapan kalakip ang salary adjustment computations, at iba pang kailangang dokumento.
Ipinag-utos din ni Secretary Pangandaman ang pagbuo ng Salary Standardization Law VI (SSL VI) dashboard para sa transparency, accountability at good governance.
Ang dashboard ay isang tool designed na nagbibigay ng real-time data kaugnay sa paglabas ng pondo, monitoring at oversight.
Makikita ito sa website ng DBM na https://www.dbm.gov.ph/.
Sa datos ng Civil Service Commission, nasa 2.037 million ang kabuuang career at non-career na manggagawa sa pamahalaan.
