MANILA, Philippines – Kinumpirma ni Vicente Sotto III na halos wala nang hawak na committee posts si Sen. Ronald dela Rosa.
“Yes, almost all,” sagot ni Sotto sa mga mamamahayag noong Pebrero 25 nang tanungin kung may natitira pa bang committee assignments si dela Rosa.
Nang tanungin kung dahil ito sa matagal na pagliban ni dela Rosa, sinabi ni Sotto: “Senate rules on number of non-attendance of a member in a committee.”
Pinakahuli, iminungkahi ni Senate Majority Leader Juan Miguel Zubiri na palitan si dela Rosa ni Sen. Joel Villanueva bilang miyembro ng Senate Committee on Justice and Human Rights.
Noong nakaraang linggo naman, pumalit si Sen. Robinhood Padilla sa puwesto ni dela Rosa sa Senate Committee on Accountability of Public Officers and Investigations o Blue Ribbon Committee.
Kasama ni Villanueva, pinalitan din si dela Rosa sa Senate Committee on Ethics and Privileges nina Sens. Imee Marcos at Rodante Marcoleta.
Ayon kay Sotto, ang mga kapalit sa iba pang natitirang committee posts ni dela Rosa ay ihahalal pa, at ang mga komiteng hindi pa nagpupulong kamakailan ay pansamantalang mananatili muna ang kanyang membership.
Batay sa Senate rules, “unexplained absences in five (5) successive committee meetings may operate to relinquish regular membership therein.”
Mula nang ihayag ni Ombudsman Jesus Crispin Remulla noong Nobyembre na may warrant of arrest na ang International Criminal Court laban kay dela Rosa, hindi na ito nagpakita sa Senado.
Pinangalanan si dela Rosa ng ICC Senior Trial Lawyer na si Julian Nicholls bilang isa sa mga co-perpetrators ni dating Pangulong Rodrigo Duterte sa kampanya kontra droga. RNT/MND
