MANILA, Philippines – Pinaalalahanan ng Department of Labor and Employment – Bureau of Working Conditions (DOLE-BWC) ang mga business establishments na maaari silang magsuspinde ng trabaho sa panahon ng masamang lagay ng panahon at kahalintulad na pangyayari upang masiguro ang kaligtasan at kalusugan ng mga empleyado.
Sa social media post, sinabi ng DOLE-BWC na ang suspension ng trabaho ay nakasaad sa Labor Advisory No. 17, Series of 2022, “Suspension of Work in the Private Sector by Reason of Weather Disturbance and Similar Occurrences.”
Kasabay nito, pinaalalahanan din nito ang mga kumpanya tungkol sa pagbabayad ng sahod para sa mga empleyadong magre-report o hindi magre-report sa trabaho.
Nabanggit ng DOLE na ang mga empleyado ay walang pananagutan sa kaso ng pagkabigo o pagtanggi sa trabaho.
“Employees who fail or refuse to work by reason of imminent danger resulting from weather disturbances and similar occurrences shall not be subject to any administrative sanction,” ayon sa DOLE. (Jocelyn Tabangcura-Domenden)
