MANILA, Philippines – Sinabi ni Batangas 1st District Rep. Leandro Legarda Leviste na handa at bukas siya na ilabas sa publiko ang umano’y listahan ng DPWH insertions para makita at masuri ng lahat ng Pilipino.
Gayunman, nais niyang magmula muna ang pahintulot kay DPWH Secretary Vince Dizon.
Ibinigay ni Leviste ang pahayag noong Linggo, Disyembre 21, ilang araw matapos matagpuang patay sa isang bangin sa Benguet ang pinagmulan umano ng listahan na si dating DPWH Undersecretary Maria Catalina Cabral.
Ayon kay Leviste, ibinigay sa kanya ni Usec. Cabral ang mga file noong Setyembre 4, matapos umano siyang utusan ni Secretary Dizon sa telepono na ilabas ang mga ito para sa transparency.
Simula noon, marami na raw ang humihiling na ilabas sa publiko ang mga naturang dokumento.
Nilinaw ng kongresista na maghihintay siya ng pahayag at pahintulot ng DPWH, at ilalabas lamang niya ang mga file kung papayag si Secretary Dizon.
Inamin din ni Leviste na malawak ang posibleng epekto ng paglalabas ng listahan dahil nakapaloob dito ang mga nagpanukala ng flood control at iba pang DPWH projects sa buong gobyerno.
Kabilang umano rito hindi lang mga kongresista at senador, kundi pati mga opisyal ng ehekutibo, ilang sekretaryo at undersecretary sa labas ng DPWH, at maging mga pribadong indibidwal.
Upang hindi makompromiso ang kanyang trabaho sa Kongreso, mas nais daw ni Leviste na ang DPWH mismo ang magdesisyon kung ilalabas ang mga dokumento.
Personal ding apektado si Leviste sa pagkamatay ni Cabral.
Sa ngayon, ang kanyang agarang alalahanin ay ang kaligtasan ng mga DPWH personnel na may hawak ng kopya ng mga file at ang pagtiyak na mapapanatili ang mga dokumento.
Gayunman, sinabi ni Leviste na maaari niyang ilabas ang ilang impormasyon tungkol sa mga insertion proponents ayon sa pinapayagan sa Kongreso, tulad ng ginawa niya noong Nobyembre 19.
Ibinahagi rin niya na ipinakita na niya ang mga file sa ICI noong Nobyembre 18 at 19, at sa Office of the Ombudsman noong Nobyembre 26, na nagsabing makatutulong ang mga ito sa kanilang imbestigasyon.
Ikinuwento rin ni Leviste na mula Mayo pa siya humihingi ng datos tungkol sa budget ng bawat distrito.
Nakipagpulong siya kay Usec. Cabral noong Hunyo 11 at muling nag-follow up sa DPWH noong Agosto 11.
Nang magbitiw si Cabral, nag-alala siyang mawawala ang mga dokumento, kaya’t nagtakda siya ng pulong noong Setyembre 4.
Ayon kay Leviste, dahil sa pagtutulak ni Secretary Dizon sa transparency, saka lamang niya natanggap ang mga kontrobersyal na file. RNT/MND
