MANILA, Philippines – Inanunsyo ng National Police Commission (Napolcom) noong Linggo na nalutas na nito ang lahat ng nakabinbing kaso laban sa mga tiwaling pulis, kabilang ang mga kasong mahigit 25 taon nang naka-backlog.
Ayon kay Napolcom Vice Chairperson at Executive Officer Rafael Vicente Calinisan, ito ang una niyang direktiba nang maupo siya sa puwesto noong Abril ngayong taon, at matagumpay na naisakatuparan ito. Dagdag niya, inaasahang magiging zero backlog na ang Napolcom pagsapit ng Martes, Disyembre 23, kung kailan gagawin ang pormal na anunsyo.
Sinabi ng Napolcom na naging posible ang paglutas ng matagal nang backlog dahil sa sama-samang pagsisikap, disiplina, at integridad ng kanilang mga opisyal at kawani sa buong bansa. Ipinapakita rin umano nito ang kanilang pangako sa reporma ng institusyon at mas maayos na serbisyo publiko.
Samantala, mariing kinondena ng Napolcom ang pagpatay sa isang pulis at ang pagkasugat ng tatlo pa matapos ang engkuwentro sa Barangay San Isidro, Candelaria, Quezon noong Disyembre 19.
Binigyang-diin ng komisyon na hindi nila kukunsintihin ang mga pag-atake laban sa mga alagad ng batas at nanawagan ng agarang pagkakakilanlan, pag-aresto, at pagsasampa ng kaso laban sa mga salarin.
Tiniyak din ng Napolcom sa publiko na mahigpit silang nakikipag-ugnayan sa Philippine National Police at iba pang ahensya upang masiguro ang masusing imbestigasyon at ang pagpapatupad ng hustisya ayon sa batas. RNT/MND
