ILOCOS NORTE, Philippines – Hindi nakaligtas sa kalawit ni Kamatayan ang isang 55-anyos na lalaki matapos bumangga sa concrete fence ang minamaneho nitong van sa bayan ng Pagudpud ng lalawigang ito kahapon ng umaga.
Ayon sa Pagudpud Municipal Police Station, ang biktima ay isang construction worker, residente ng Badoc, Ilocos Norte.
Kasama ng biktima sa loob ng sasakyan ang dalawang iba pang construction worker na edad 45 at 40 na parehong residente rin ng Badoc, Ilocos Norte
Nabatid na ang tatlo ay nakasakay sa kulay green na Mercedez Benz van at bumibiyahe papuntang timog.
Pagdating sa pakurbang bahagi ng kalsada, biglang nawalan ng kontrol sa manibela ng sasakyan ang driver hanggang sa bumangga ang minamaneho nitong sasakyan sa concrete fence.
Nang dumating ang rumespondeng personnel ng Pagudpud MPS, BFP, MDRRMO at RHU ay nakita nila ang driver na walang malay na naipit doon mismo sa driver’s seat.
Nagtulong-tulong ang grupo hanggang sa mailabas nila ang biktima.
Agad na isinugod sa ospital ang biktima ngunit idineklarang dead-on-arrival ng umatending doktor.
Hindi nasaktan sa naturang insidente ang dalawang kasama nito. Rolando S. Gamoso
