MANILA, Philippines – Sinabi ng Second Congressional Commission on Education (EDCOM 2) na kakailanganin ng 10 taong reporma upang tugunan ang malalim na krisis sa edukasyon sa Pilipinas.
Sinabi ni Karol Mark Yee, Executive Director ng EDCOM 2, na ang bansa ay may problema sa edukasyon na naipon sa halos tatlong dekada, kaya kailangan ng isang dekadang reporma.
Ihahain ng EDCOM 2 ang kanilang ikatlo at huling ulat na naglalaman ng pambansang plano sa edukasyon sa Lunes, Enero 19.
Ani Yee, sisimulan ang pagpapatupad ng mga rekomendasyon sa loob ng dalawang taon sa pamamagitan ng DepEd, CHED, at TESDA. Kabilang dito ang pagtukoy kung ilang guro at silid-aralan ang kailangan bawat taon at ang kaukulang pondo.
Binanggit din niya na ang madalas na pagsuspinde ng klase dahil sa pista opisyal, masamang panahon, at matinding init ay nagdudulot ng malaking pagkawala ng oras sa pag-aaral.
Ayon sa EDCOM, nawawala ang 30 hanggang 50 araw ng klase kada taon, na halos katumbas ng isang quarter ng school year.
Noong Disyembre 2025, iniulat ng EDCOM 2 ang malalang krisis sa foundational learning, kung saan 85% ng Grade 1 hanggang 3 ay nahihirapang bumasa. Santi Celario
