MANILA, Philippines- Hindi na maibabalik ang pagkasira ng kapaligiran ng Chocolate Hills kahit mahigpit pang ipatupad ang temporary closure laban sa kontrobersyal na private resorts sa Bohol, ayon kay Senador Nancy Binay.
Sinabi ni Binay na malawak na ang nasirang landscape sa konstruksyon ng ilang private resort sa paligid ng pamosong Chocolate Hills na idineklarang natural monument ng UNESCO at ginawang protected area.
“The temporary closure does not remedy anything or reverse damages done to the environment. It is very clear that there were infractions and willful violations of law in all levels,” ayon kay Binay.
“The extent of environmental degradation is simply unacceptable—hindi pwedeng walang accountable dito,” giit pa ni Binay.
Naunang naghain si Binay, chairman ng Senate committee on tourism, ng kaukulang resolusyon na naglalayong imbestigahan ng Senado ang konstruksyon ng Captain’s Peak Garden and Resort sa Chocolate Hills, isang pamosong tourist spot sa Bohol na idineklarang protected area ng gobyerno.
Mabilis na ipinasara ang resort alinsunod sa ipinalabas na temporary closure order.
“Walang gustong umako ng kasalanan, at medyo nagtuturuan na at naghuhugas ng kamay ang mga ahensyang directly involved in allowing the construction of a resort at Chocolate Hills,” sabi ni Binay.
“Based on the documents, since 2018 pa pala nag-start ang application ng Captain’s Peak, kaya nagtataka tayo kung bakit sa loob ng anim na taon ay nailusot ang mga permits at tinuloy ang construction which should not have been allowed in the first place,” giit ng senador.
Natuklasan din ni Binay na inamin ng Sagbayan LGU na nitong Miyerkules lamang, Marso 13, inabisuhan ng Department of Environment and Natural Resources (DENR) ang resort boluntaryong sumailalim sa temporary closure.
“So, makikita nating malamya ang enforcement at yung term na ‘voluntary closure’ means ‘optional’, ibig sabihin the resort has a choice not to stop its operations,” ayon sa mambabatas.
Ayon sa kalatas ng DENR, nagpalabas ito ng temporary closure order noong September 2023 at violation notice nitong January 2024 laban sa may-ari ng resort at inamin din nila na nagsasagawa ng operasyon ang Captain’s Peak kahit walang environmental clearance certificate (ECC).
Sinabi naman ng Department of Tourism (DOT) na nakikipag-ugnayan sila sa Bohol provincial government simula pa noong August 2023, hinggil sa konstruksyon ng resort sa lugar. Ernie Reyes
