MANILA, Philippines – Siniguro ni Department of Public Works and Highways (DPWH) Secretary Manuel Bonoan nitong Martes, Agosto 8, na ang flood control projects ng pamahalaan ay nananatiling “on track.”
Sa press briefing sa Palasyo, tinanong si Bonoan kung kamusta na ang flood control projects, makaraang punahin ng mga senador ang hindi pa rin masolusyunang problema ng pagbaha.
Ayon kay Bonoan, nagpapatuloy pa rin ang proyekto para solusyunan ang flood crisis.
“Let me put it this way, I can only speak for what we started, actually we have just been in this administration for one year and the projects that we’re implementing for flood control projects under the 2023 budget is ongoing, ongoing pa rin ‘yung mga projects that we’re implementing…” pahayag ni Bonoan.
“I think they have quoted actually the total amount of about P180 billion, but this is, ‘yung amount na ‘yan is distributed all throughout the country. They are ongoing… they are on track actually… wala namang… doon kasi sa budget namin [in our budget], we have two years to implement all these projects…” pagpapatuloy nito.
Aminado naman si Bonoan na ang ilang “small” flood control projects ay na-delay ngunit sa kasalukuyan, muli na itong ipinagpatuloy.
Binanggit din ng opisyal na ang ilang dahilan sa delay ay ang panahon, right of way at posisyon ng lugar.
“I can admit that there are some projects that have been delayed, maliliit lang naman [not that big] … most of them are ongoing right now,” sinabi pa ni Bonoan.
Nakatakdang ipatawag ng Senate public works committee si Bonoan at Metropolitan Manila Development Authority chairperson Romando Artes upang ipaliwanag ang hindi pa rin nareresolbang problema ng pagbaha sa maraming lugar.
Ayon kay Senate panel chairman Senator Ramon “Bong” Revilla Jr., ang DPWH ay nakatanggap ng kabuuang P594.62 billion ng pondo para sa flood control projects nito habang ang MMDA ay nakatanggap ng P6 bilyon, batay sa national budgets mula 2019 hanggang 2023.
Ani Revilla, iniulat ng National Disaster Risk Reduction and Management Council na mayroong 425 flooding incidents sa pananalasa ng bagyong Egay at habagat. RNT/JGC
