MANILA, Philippines – Sinabi ni Commission on Elections (Comelec) Chairperson George Garcia nitong Lunes na mag-i-inhibit siya sakaling magsampa ng kaso laban kay Senador Francis “Chiz” Escudero kaugnay ng umano’y bawal na campaign donation noong 2022.
Bilang dating election lawyer ni Escudero, giit ni Garcia: “I will inhibit, especially in the case of Sen. Chiz Escudero, because I have served before as his lawyer.”
Inamin ni Escudero na tumanggap siya ng P30 milyon mula kay Lawrence Lubiano, presidente ng Centerways Construction and Development Inc., pangunahing flood control contractor sa Sorsogon. Bawal sa Omnibus Election Code ang pagtanggap ng donasyon mula sa mga kontratista ng pamahalaan.
Naglabas na rin ng show cause order ang Comelec para ipaliwanag ni Lubiano ang naturang donasyon. Dagdag pa ni Garcia, ilalabas din nila sa publiko ang listahan ng mga kontratistang sangkot sa campaign contributions kapag nakatanggap na sila ng kumpirmasyon mula sa Department of Public Works and Highways. RNT
