MANILA, Philippines – Naghain si House Assistant Minority Leader at Eastern Samar Rep. Christopher Sheen Gonzales ng panukalang batas para taasan ang World Teachers’ Day Incentive Benefit (WTDIB) mula ₱1,000 tungo sa ₱3,000 para sa mahigit 950,000 pampublikong guro sa ilalim ng Department of Education (DepEd).
Nakasaad sa House Bill 4531, na inihain noong Setyembre 11, na gagawin ding permanente ang taunang insentibo na unang ipinagkaloob noong 2019.
Ibinibigay ito tuwing Oktubre 5 bilang bahagi ng pagdiriwang ng World Teachers’ Day.
“Teachers are the bedrock of nation-building. By increasing the WTDIB, we are not just providing financial assistance — we are sending a clear message that the country values the dedication and sacrifice of our educators,” pahayag ni Gonzales.
Dagdag niya, makatutulong ang dagdag insentibo upang maibsan ang epekto ng mataas na gastusin at magsilbing “pambansang pasasalamat” sa mahalagang papel ng mga guro sa pagbubuo ng kinabukasan ng kabataan. RNT
