MANILA, Philippines – Bumuo ang Philippine National Police (PNP) ng tracker teams para tugisin si dating PCSO general manager Royina Garma at iba pang suspek sa pagpatay noong 2020 kay retired police general at PCSO board secretary Wesley Barayuga, matapos maglabas ng arrest warrant ang Mandaluyong court.
Saklaw ng kautusan ng Mandaluyong RTC Branch 279 noong Setyembre 13, 2025 sina Garma, Lt. Col. Santie Mendoza, retired police colonel at dating Napolcom commissioner Edilberto Leonardo, at mga dating pulis na sina Nelson Enriquez Mariano at Jeremy Causapin. Tanging si Mendoza lamang ang nasa kustodiya sa Camp Crame.
“The PNP respects and upholds the order of the Mandaluyong court… Our priority is to bring the suspects before the proper court without delay,” ani PNP acting chief Lt. Gen. Jose Melencio Nartatez. Pamumunuan ng CIDG ang operasyon at makikipag-ugnayan sa mga regional at intelligence units.
Ayon kay CIDG NCR chief Lt. Col. John Guiagui, may hawak na silang impormasyon sa kinaroroonan ng mga suspek. “We will do a manhunt operation regardless of status, regardless of position… As long as there is warrant, we will enforce it,” aniya.
Iniulat na bumiyahe si Garma patungong Malaysia ngayong buwan matapos siyang ipadeport mula sa US na tumanggi sa kanyang asylum request. Pumayag na rin siyang maging testigo laban kay dating Pangulong Rodrigo Duterte sa International Criminal Court.
Noong Pebrero, naghain ng kasong murder at frustrated murder ang NBI laban kay Garma kaugnay sa pagkamatay ni Barayuga, matapos ituro ni Mendoza sina Garma at Leonardo bilang utak ng krimen sa isang congressional inquiry. Santi Celario
